Match hmasa berah Sabalenka a chak lo

Hmeichhe tennis world number 2 Aryna Sabalenka chuan season bul ṭan nan Adelaide International a khel a, nimin khan a match hmasa ber khelin Kaja Juvan lakah 7-6 (6), 6-1 in a chak lo.

Sabalenka hian season hmasa kha a hmang ṭha. Wimbledon leh US Open-ah final a lut a, mahse a champion zo lo thung. Juvan-i lakah hian set point a hmuh hmasak a chhawr ṭangkai thei lo a, tie break-ah a vanduai chhunzawm.

Set hnihnaah Sabalenka-i'n double faults vawi 11 ngawt a nei a, match pumpuiah ṭum 19 ngawt a nei. Thlasik chawlh hnua a match khelh leh hmasak ber hi harsa a ti hle, a rang thei ang bera insiamṭhat nghal a tum ang.

Kum 23 mi Sabalenka chuan, "Tih sual ka ngah takzet, ka insiamṭhat theih miau loh avangin a tawpah ka tuar. Ka khel ṭha lo, chutih rualin ka khingpui Juvan khan a khel ṭha hle, a ball vuak kha lak a harsa ṭhin," tiin a sawi.

Adelaide Inter-national-ah hi tun thla chawhnu lama khelh tur Australian Open inbuatsaihna zinga pakhat a ni.