Serie A thlasik chawlh a zo ; AC Milan mikhual tur AS Roma

Italy rama football inelna sang ber Serie A season kal laia thlasik chawlh an hmang zo a, vawiin tlai aṭangin league match an khel chhunzawm leh dawn - zanin dar 11:00 hian AC Milan chuan AS Roma an mikhual ang.

AC Milan hi champion tum an ni a, hmahruaitu Inter Milan an phak lohna chu point li chauh a ni. Jose Mourinho enkawl Roma erawh Champions League khelh phak tur an ni thung, parukna niin palina Atalanta nen an inkarah point ruk a awm.

Chawlh hma boruak
Milan hian season bul an ṭan fuh takzet, mahse December thla khan Napoli an ngam loh bakah Udinese nen an inhnehtawk a, chawlh hma an match hnuhnung berah erawh Empoli 4-2 in an hneh.

Stefano Pioli-a'n hliam vanga Simon Kjaer a chan hnuah tlarhnung remphui a harsat rih a, an buaina hi chawlh chhung khan a chinfel dan a hre hman em tih chu zaninah kan hmu dawn. Tlarhnung phui lo chung chuan Serie A champion nih a harsa ang.

Roma hi hriatthiam harsa tak an ni. Team ṭha pangngai tak ni mah se an result a ngelnghet tawk lo, match ṭhenkhata an chak hluai laiin holam taka chak loh leh point hloh an ching. Mourinho-a'n danglamna a thlen thei em tih chu a takin kan hmu dawn bawk.

Milan an buai ru?
Zlatan Ibrahimovic leh Olivier Giroud te an la rintlak, chutih rualin player pahnih hi an kum a tam tawh bakah hliamin a tibuai ve deuh reng - zaninah pawh tu zawkin nge bul ṭan ang hriat theih a la ni lo.

Rafael Leao leh Ante Rebic te chu hliam vangin an inlan thei dawn lo. African Cup of Nations khel turin Franck Kessie leh Ismael Bennacer te an zin chhuak bawk; an hmunruakah Sandro Tonali leh Tiemoue Bakayoko te an luh a ngai ang.

Roma pawh hian hri leng vangin player ṭhenkhat an chhawr thei dawn lo, hripui kai player hming hi tarlan ni lo mah se pahnih aiin an tam. Chanchin duhawm lo a awm lai hian Stephan El Shaarawy erawh inkhel turin a inpeih leh tawh thung a ni.

Juve mualah Napoli
Kum thar bul ṭanna inkhel zingah Juventus leh Napoli inhmachhawn tur hi a hmuhnawm tur zinga mi a ni ang. Napoli hi season bul ṭan ṭha, mahse thlasik chawlh hma deuha zuih an ni, kuminah insiamṭhat nghal an tum ang.

Napoli letling chiahin Old Lady an awm thung. Massimiliano Allegri naute hian season bul ṭan fuh lo mah se an insiamṭha tawh a, tunah chuan season thara Champions League khelh pawh an beisei ngam leh tawh.

Juve hian squad nei chhah ṭha ber an ni a, a tir lamah hnufual deuh mah se season chawhnu lamah chuan team tlo leh khawng tura ngaih an ni. Chutih rualin palina Atalanta an phak lohna point li lai a la ni a, an chetsual a thiang tawh lo ang.