League Cup semifinal first leg Leicester City 1- 1 Aston Villa

Caraboa Cup-ah Leicester City-in Nilaini zan khan an mikhual Aston Villa lakah harsatna an tawk a, Kelechi Ilheanacho hmangin 1-1 in an chelh hram. King Power Stadium-a inkhelah hian Villa tan Frederic Guilbert-a'n minute 24-naah a khung a, minute 74-naah Nigerian forward Ilheanacho-a'n siphurh a sut.

League Cup semifinal second leg hi January 28, Thawhlehni zanah Villa Park-ah khelh a ni dawn. Semifinal dangah Manchester City chuan an hmelma Manchester United chu Old Trafford-ah 3-1 in an sawp tawh a, anni hian second leg hi Etihad Stadium-ah January 29, Nilaini zan hian an khel ang.

Premier League table aṭanga thlir chuan Leicester City chu awlsam taka chak thei tura ngaih an ni a. An khingpui Aston Villa hian semifinal lut turin Liverpool hneh mah se an hmachhawn Reds hi B-Team a nih avangin dah san viau theih an ni lo.

League table-a pahnihna Foxes aiin 17-naa awm mek Aston Villa-in goal an khung hmasa a, an goal khung dan pawh team goal a ni. Villa-in awmze neia ball an inpek kual hnuah an player manto zinga mi Trézéguet chuan vei lam aṭangin ṭha zetin a cross a, minute 24-naah defender Guilbert-a'n a tlawh lut.

Leicester-in hliam vangin Wilfred Ndidi chhawr thei lo mah se Jamie Vardy a rawn let leh tawh a, Brendan Rogers-a'n a player neih ṭhat ho a luhtir avangin chak an duh tih a lang. Amaherawhchu Villa captain Jack Grealish chu mual chhunga langsar ber a ni.

Grealish hian ball kawl rei a ṭul chuan a kawl rei a, a hunah ball a pe chhuak a, Leicester tan inkhelh chhung zawngin a hnawksak. England manager Gareth Southgate-a'n Grealish che lai hi a hmuh avangin Euro 2020 squad a thlan hunah ngaihtuahna sen tur a neih belh dawn a; England tana inlan tawh Villa defender Tyrone Mings bakah Leicester duo James Maddison leh Ben Chilwell te hnung zui thei dinhmunah a ding.

Villa-in goal khat hum duhin hun an khawhral chho a, an chetsual phah. Foxes-in pressure pe turin Hamza Choudhury an dahluh chu an tifuh a, Bangladeshi thisen kai Choudhury pressure pek ṭhat zarah Foxes-in siphurh an sut. Choudhury thawhrah vanga ball per chu Vardy-a'n changin Ilheanacho a pe nghal a, Man City forward hlui hian minute 74-naah  ṭha zetin a pet goal.

Leicester hian an mualah dinhmun an siam ṭha thei lo a, Villa Park-ah hmabak a harsa sawt ang. Foxes hi kum 2000-a League Cup nomawi an chawi hnuah an la champion leh lo a, Villa hi 1996 hnuah League Cup-ah an la champion bik lo.

Leicester boss Brendan Rodgers chuan, "Kelechi hian theihna sang tak a nei a. Chutihrualin Manchester City-ah khelhna a hmun a chan tam bik loh avangin a theihna ang lanchhuahtir turin hun a duh. Tunah chuan inrintawkna a nei a, a thawkrim bawk. Goal a khung hi ka lawm hle," tiin goal khungtu a fak.

Aston Villa manager Dean Smith chuan, "Second leg hmuhnawm tak en tur a awm ang. Leicester kha an khel ṭha zawk a, chuvangin inhnehtawk hi result awm tak a ni," tiin a sawi.