Independence Cup semifinal lut hmasa ber Electric Veng
I League club Aizawl FC-in Inrinni khan Ramhlun North 2-1 in an hneh a, Electric Vengin group match hnuhnung ber khelh hma hauhin LG Independence Cup semifinal an lut. Zan lamah Electric Vengin hnehna an chang zui tho a, group A hmahruaitu nih beisei chhunzawm turin Bethlehem Vengthlang 2-1 in an hneh.
Independence Cup-ah group khatah team nga an awm avangin khel zo hmasa an awm a ngai a, Electric Veng hian match li khelin hneh loh an tawng lo.
MPL club thar hnung zui tur hian Aizawl FC dinhmun a ṭha ber a, I League club hian August 7-a BVT an hneh a nih chuan hemi zana Ramhlun North leh Chanmari FC inkhel result-in nghawng a nei lo ang.
Champion rinkai AFC
MFA Super Cup-ah Aizawl FC-in Chanmari FC hneh loin an tla a, Independence Cup-ah erawh an elpui hi 6-0 zetin an hneh let.
Amaherawhchu match hmasa bera Electric Veng an hneh loh avangin Ramhlun North hneh ngei a ṭul a, Alfred Kemah Jaryan tel loin Ramhlun North 2-1 in an hneh.
Inrinni tlai inkhelah Ramhlun North tan Vanlalawma'n minute ngana lekah hmahruaina goal a khung nghal a, amaherawhchu Aizawl FC-in defender thar Lalrinchhana Tochhawng hmangin minute 14-naah an chhang lêt. MPL-a Chanmari FC leh Chhinga Veng champion pui tawhtu defender Rinchhana hian a club hlui CFC an hneh ṭumin goal a khung bawk.
I League club tan hian David Lalrinmuana chuan minute 24-naah chakna goal a khung. Zemabawk North tlangval hi tun hnua Aizawl FC indinthar lehin player pawimawh a ni nghal a, ONGC leh East Bengal-ah te chhuak bawk mah se AFC hmel lanna berah ngaih theih a ni.
Electric a êng
Electric Vengin pressure nei loin group match hnuhnung ber an khel a, Khawhai tlangval Vanlalremsanga chuan minute 24-naah hmahruaina goal a khung a, Salem Veng tlangval David Lalchhuanawma'n minute 71-naah a khung belh leh bawk.
Bethlehem Vengthlangin minute li a la awm tihin Lalruatkima hmangin siphurh an sut ṭhen a, goal dang an khung belh theih loh avangin point an hmu lo.
Electric Veng manager Lalchhanhima chuan, "Player-te thawhrimna zarah team ṭha BVT kan hneh a, semifnal kan lut ta bawk. Fixture a chhuah chiah kha chuan kan khelh dan tur kha a duhawm lo a, amaherawhchu kan paltlang takah chuan semifinal atan inpuahchahna hun ṭha kan neih phah zawk. Football hian veng inlungrualna a thlen a, Lammualah ṭantu tam tak kan nei ṭhin hi a lawmawm hle. Heng zawng zawng hi kan ṭawngṭai tamna leh Pathian malsawmna a ni," tiin Vanglaini a hrilh.
Group A
Results & Fixtures
27 July, Zirtawpni
Chanmari FC 2 – 0 Bethlehem VT FC
CFC : Laldampuia 28'; Lalrammuana 90+1'
MoM: R. Lalawmpuia, CFC
Aizawl FC 1 – 2 Electric Veng FC
AFC : Lalkhawpuimawia 85'
EFC : Isak Vanlalpeka 18'; Vanlalhmangaiha 27'
MoM : Lalrinnunga Hnamte, EFC
31 July, Thawhlehni
Electric Veng FC 0 - 1 Chanmari FC
MoM : C. Laldinmawia, EFC
Bethlehem VT 1 - 2 Ramhlun North
BVT : Lalhlimpuia 71'
RNT : Vanlallawma 39'; Lalnunmawia 64'
MoM: Lalliansanga, Ramhlun North FC
2 August, Ningani
Ramhlun North 2 - 2 Electric Veng FC
RNFC : Lalnunmawia 3'; Lalliansanga 39'
David Lalchhuanawma 38', Vanlalhmangaiha 66'
MoM: Vanlalhmangaiha, EFC
Chanmari FC 0 - 6 Aizawl FC
AFC : Lalrinfela 20'; Lalrinchhana Tochhawng 24';
Lalkhawpuimawia 61', 66', 81'; Hmangaihkima 77'
MoM: Lalkhawpuimawia, Aizawl FC
4 August, Inrinni
Aizawl FC 2 - 1 Ramhlun Norh FC
AFC : Lalrinchhana Tochhawng 14'; David Lalrinmuana 24'
RNFC : Vanlalawma 5'
MoM: Lalrinchhana Tochhawng, AFC
Electric Veng FC 2 - 1 Bethlehem VT
EFC : Vanlalremsanga 24'; David Lalchhuanawma 71'
BVT : Lalruatkima 86'
MoM : Vanlalremruata, EFC
7 August, Thawhlehni
2:00 PM Bethlehem VT Vs Aizawl FC
7:00 PM Ramhlun North Vs Chanmari FC