LG Independence Cup Chhinga Veng an ṭha, Police dinhmun a him lo

MFA Super Cup champion Chhinga Vengin LG Independence Cup-ah pawh nomawi humhim ngei an tum a, match hnih an khelh tawhah an la chak ve ve. Chhingcows hian Zirtawpni zan khan Mizoram Police 2-1 in a hneh a, group B aṭanga semifinal lut turin an dinhmun a ṭha hle.

Vawiin chawhnu dar 2:00 hian Lalsangzuala Hmar enkawl Chhinga Vengin state pawn team awmchhun Jamshedpur FC Reserves an hmachhawn dawn a, hnehna an chang a nih chuan semifinal an lut ang. Zanin dar 7:00-ah Chawnpui FC leh Kanan FC te an inkhel dawn a, MPL kai thar Chawnpui hian knockout stage lut turin beiseina an la nei.

Police hnehtu Chhingcows
Kumin Independence Cup-a inkhel hmuhnawm bera chhal theih chu Zirtawpni zana Chhinga Veng leh Mizoram Police inkhel a ni a, mual chhung leh pawnah boruak a sang hle.

Chhinga Vengin Lalmuansanga hmangin minute 18-naah hma an hruai a, Police-in R. Malsawmtluanga penalty hmangin first half tawp hma hretin an sut. Minute thum chiah a awm tawh tihin Lalrinchhana'n freekick aṭangin Chhinga Veng chakna goal a khung. Police keeper Lalmuanawma'n Mizoram tana a khelhpui ṭhin Rinchhana pet dan a chhut sual a, coach Sanga hnuaia an tih ṭhin dan a hriat reng chu a tihsual chhan a ni.

Team pahnih goal khung ṭum khat ve ve pawm sak an ni lo a, chak lo zawk Mizoram Police-in duh thlang thei se final-ah Chhinga Veng ngei hmachhawn nawn an duh ang.

Hmabak awlsam
Chhinga Vengin season liam taa champion theih zawng zawng an champion a, tun season-ah MFA Super Cup nomawi an humhim bawk. Chhingcows hian vawiin tlai hian Jamshedpur an hmachhawn dawn a, ISL club reserves hian ADBBA first division club Kanan FC an draw hram a, coach Sanga hote tan harsa tur awmin a lang lo.

Zanina Chawnpui leh Kanan FC inkhel tur erawh an intluk a, a entlak ang. First division club hian MPL club thar semifinal beiseina tihtawp an hreh lo ang. Chawnpui erawh MPL club an nih hnuah Jamshedpur chiah an la hneh avangin an record siam ṭhat a ṭul a, inrintawkna nei turin Kanan hneh hi an tih makmawh a ni.

Group B
Results & Fixtures
28 July, Inrinni
Mizoram Police FC 2 - 1 Chawnpui FC
MPFC : Lalbiakhlua 61'; Lalfakzuala 62'
CHFC : Vanlalnghenga 7'
MoM: Lalbiakhlua, MPFC
Chhinga Veng FC 2 - 0 Kanan FC
CVFC : Vanlalzuidika 13'; Lalromawia 73'
MoM : Lalromawia, CVFC
1 August, Nilaini
Kanan FC 1 - 2 Mizoram Police
KFC : Lalhriatpuia 90+2'
MPFC : R. Malsawmtluanga 37'; V. Laltanpuia 70;
MoM : V. Lallaltanpuia, MPFC
Chawnpui FC 2 - 1 Jamshedpur FC
CHFC : Subham Ghosh 54' (OG); Lalramliana 76'
JFC : Billu Telli 35'
3 August, Zirtawpni
Jamshedpur 2 - 2 Kanan FC
JFC : Billu Teli 5'; Rakesh Yadav 84'
KFC : Joseph Lalvenhima 9'; H Malsawmtluanga 34'
MoM: Rakesh Yadav, JFC
Mizoram Police 1 - 2 Chhinga Veng FC
MPFC : R Malsawmtluanga 43' (P)
CVFC : Lalmuansanga 18'; Lalrinchhana 87'
MoM : MS Dawngliana, CVFC
6 August, Thawhṭanni
2:00 PM Chhinga Veng Vs Jamshedpur
7:00 PM Kanan FC Vs Chawnpui FC
August 8, Nilaini
2:00 PM Chawnpui FC Vs Chhinga Veng
7:00 PM Jamshedpur Vs Mizoram Police