Test match hmuhnawmah England-in India an hneh

England chuan India nena test match vawi nga an khelh tura a hmasa berah hnehna an chang. India captain Virat Kohli-a century siamin awmzia a awm lo a, England hi ni linaah run 31 in an chak.

Specsavers Test hmasa berah England-in first innings-ah run 287 an siam a, India tana Kohli-a'n run 149 a siam zarah run 274 in an chhanglet. Second innings-ah India bowler-te an che ṭha a, Ishant Sharma-a'n run 51 chiah pe a, wicket nga zet a lak avangin England-in run 180 chiah an vaw chhuak.

India tan chak turin run 193 siam a ngai a, test hmasa ber la turin an dinhmun a ṭha hle. Amaherawhchu, ni thumnaah hian India hian run 110 an siam a, wicket nga an hloh avangin chak lo thei dinhmunah an ding.

Ni linaah England bowler te an dingchang. Ben Stokes chuan India inghahna Kohli a vawm hlum a, Men in Blue captain hian run 51 siam tho mah se thlawptu a nei lo.

Stokes hian wicket li lain run 40 chiah a pe a, India hian second inings-ah run 162 chauh siamin run 31 in an chak lo. India captain Virat Kohli chuan, "Kan tum chu hnehna chang a ni a, kan tum kan hlen theih loh avangin ka century hian awmzia a awm lo," tiin a sawi.

England leh India hian August 9-13 hian Lord's-ah second test an khel ang.