Sindhu tawpna Silver
Badminton World Championship-ah PV Sindhu-i'n silver medal a dawng. Nimin tlai hmeichhe singles final khelhah Indian shuttler hi Carolina Marin lakah 21-19, 21-10 in a chak lo zawkah a ṭang - a kum zawnin silver medal a dawng ta a ni.
Nanjing, China-a inkhelah player pahnihte set khatnaah an inkhel tawk hle a, mahse set hnuhnung zawkah erawh world number 1 hlui Marin a chungnung, a tir lamah 5-0 a hma hruai nghalin, harsatna nei loin hnehna a chang tlang thei.
Kum 25 mi Marin hian 2014 leh 2015 khan World Championship title hi a lo la tawh a, tun ṭuma a champion leh tak avangin hmeichhe singles-a vawi thum champion thei hmasa ber a ni ta.
Spanish shuttler Marin-i'n Rio Olympic gold medal inchuhna inkhelah Sindhu bawk hi a lo hneh tawh, tun hnaia player ṭha pahnih ten match pawimawh bik an khelhah Marin zawk zel a dingchang.
Sindhu tan silver
Season hmasa khan Sindhu-i'n silver medal a dawng tawh a, kuminah a vawi khat nan champion a tum ruh hle. Indian nula hian semifinal-ah seeded pahnihna Akane Yamaguchi chu 21-16, 24-22 in a hneh thei a, hei hian inrintawkna pawh a siam tura ngaih a ni.
Final khelh hmain Shindhu hian, "A harsa dawn, point khat lek hmu tur pawhin thawhrim a ngai hle ang, a ṭha thei ang bera ka khelh a ngai dawn a ni," tiin a sawi lawk. Marin hmaah Hyderabad star hi a tir lamah zam lo mah se, boruak a san hnuah a rilru a huaisen tawk lo, tihsual a ngah chu a tuar.
Set hmasa zawkah break an neih laiin Sindhu-i'n 11-8 in hma a hruai, an ṭan leh hnuah 14-9 a neih leh avangin set la tura ngaih a ni. Amaherawhchu, Marin a beidawng lo, 15-15 a nih puihnuah a tlang zawkah a ṭang, set hnuhnung zawkah buaina a tawk lo - Marin aiin Sindhu ruh a no zawk.
Kum 23 mi Sindhu-i'n 2013 leh 2014 World Championship-ah khan bronze medal a lo dawng tawh a, nikumah silver a la bawk. Inelna lian leh ngaihhlutah hian medal pathum ngawt vaw chhuak tawh mah se a duh leh tum ber a la hlawhchhuah theih loh avangin a tum ram a la thleng loah a ngaih theih, season tharah beiseina nen a inlan leh ang.