Mizoram Under 15 League an ṭan ta

Mizoram Football Association leh Tata Trusts buatsaih, Mizoram Under 15 League chu Inrinni aṭang khan Rajiv Gandhi Stadium-ah khelh ṭan a ni a, round hmasa berah hian match nga awmin goal 23 a lut nghal.

Indian football technical director hlui Colm Toal hnuaia khel Tata Trusts COE an che ṭha nghal a, 6-0 in Kanan FC an sawp.

Goal khung tam ber erawh M28 Academy niin Competitor for Christ chu 8-0 in a hneh. Aizawl High School chuan Mizo football legend S. Malsawmtluanga nena thawk hoin M28 Academy an din a, Republic Veng Games & Sports Association nen ṭang hoin acaemy-a lut player ṭha leh Republic Veng rawlthar ṭha rual awm khawm an ni.

Team ṭha tura ngaih Aizawl Grassroots Centre pawhin Bawngkawn GSA chu 4-0 in an hneh. COE dawta Mizorama academy changtlung bera ngaih Aizawl FC Academy erawhin Armed Veng club FC Stonzz lakah hnehna chan a awlsam lo a, 3-2 a chak hramin point thum hlu tak an hlawh chhuak.

Match hnuhnung berah MPL club Chanmari FC Under 15 team leh Sihphir Venghlun FC te goal awm loin an inhnehtawk. Tun hnaiah Sihphir Venghlun FC-in hma an sawn a, Aizawl DFA hnuaiah result ṭha an nei ṭhin a, Under 15 League-a an ziah luh bawk avangin player ṭha zawk an inchher belh ang.

Round 1 – August 4, Inrinni
AFC Academy 3–2 FC Stonzz
AFC: Andrew Lalchungnunga 9',20'; Aiyush Dev Chhetri 63'
FCS: John F Malsawmtluanga 48'; Michael Lalhruaitluanga 58'
Aizawl Grassroots Centre 4–0 Bawngkawn GSA
AGC: Francis Vanlaldika 10'; Lalawmpuia Sailo 39';
Vanlalpeka 56'; Lalrempuia Hmar 62'
M28, Republic Veng 8–0 Competitor for Christ
M28 : Lalrinchhana 11', 16'; C. Lalrempuia 19';
Lalnunzira 28', 37', 39'; C. Laldinthara 48';
Wesley Lalmuanpuia 50'
Tata Trusts CoE 6–0 Kanan FC
CoE : Kumar Basuma Tary 8'; TC Vanlalruatfela 9', 37', 51'; Baron Yim Jong 14'; Samuel Lawmsiamkima 43'
Sihphir Venghlun FC 0–0 Chanmari FC
Round 2 – August 11, Inrinni
Sihphir Venghlun FC 9:00 AM Kanan FC
Chanmari FC 10:30 AM Competitors for Christ
TataTrusts COE 12:00 PM Bawngkawn GSA
M28, Republic Veng 1:30 PM FC Stonzz
Aizawl Grassroot Center 3:00 PM Aizawl FC