Tuchel-a'n nomawi chawi nghal

Paris St Germain manager thar Thomas Tuchel chuan French club tan inelna match pangngai a hmachhawn hmasak berah AS Monaco chu 4-0 in an sawp a, a vawi riat nan French Super Cup champion an ni.

Inrinni zan khan Shenzhen Universiade Sports Centre, China-ah club pahnihte hi an intawng a, French champion PSG tan Angel Di Maria-a'n goal hnih a khung bakah Christopher Nkunku leh Timothy Weah te chuan goal an khung ve bawk.

Tuchel tan French Super Cup hi fiahna hmasa a ni a, chutihrualin fiahna tak erawh a inṭan dawn chauh. August 1 zan hian season thar Ligue 1 match hmasa ber atan Caen an mikhual ang a, an elpui Monaco hian Pathianni zanah Nantes an lenchilh thung ang.

Neymar a inlan

Season hmasa khan Paris St Germain hian Ligue 1 leh French Cup an chawi kawp a, hei vang hian pahnihna Monaco nen Super Cup an khel. Goal thum an thun hnuah Neymar chu substitute bench aṭanga luhtir a ni.

Brazil international forward hi nikum Ferbruary thla khan a inhliam a, a ke hliam a dam hnuah tun ṭum hi club tana a inlan lehna hmasa ber a ni. PSG tan Juventus keeper hlui Gianluigi Buffon-a'n goal a veng thei bawk a, season tharah player ṭha pahnih hian bul an ṭan chho thei tura ngaih a ni.

World Cup khela zin chhuak Kylian Mbappe leh Edinson Cavani te pawh China-ah zin ve mah se khelhtir an la ni lo. France leh Uruguay international forward te hi World Cup-ah an thlen san avangin chawlh an nei rei a, league-ah bul an ṭan lo a nih pawhin bench-ah dan theih an ni ve tawh bawk ang.