Blues chaihtu City kutah Community Shield

Manchester City chuan Chelsea lakah 2-0 a hnehna changin FA Community Shield an chawi. Pathianni zan inkhelah Pep Guardiola nauten game mawi hmangin Blues lakah ro an rel a, striker Sergio Aguero-a'n goal 'class sang' pahnih khungin a club tan goal 201 a nei tling tla.

Premier League leh FA Cup champion ten an inchuh ṭhin Community Shield-ah hian 2012 khan Manchester United chuan Wigan 2-0 in an hneh a, United hnuah Man City hi league champion ni chunga 'shield' la leh thei hmasa ber an ni.

Season dang zawng aiin inbuatsaihna hun a tlem a, World Cup neih kum anih avangin chawlhkar thum chiah inbuatsaihna hun an nei. Club pahnih hian an player ṭha ṭhenkhat an chhawr thei lo ve ve; hun chep tak kara game pangngai khel thei zawk Man City-in chak an phu.

City midfield
Point 19 zeta league champion ni thei Manchester City tan Kevin de Bruyne, Raheem Sterling leh David Silva te an la inlan thei lo a, pound maktaduai 60 man Riyad Mahrez-a'n bul a ṭan thung a, English rawlthar duhawm Phil Foden leh Bernardo Silva te a laiah inkawpin, an hnungah tawnhriat nei ṭha Fernandinho a awm a, captain armband a hreng bawk.

Kum 18 mi Foden-a'n Chelsea defender kara ven loha awm Aguero hmu fuhin ball a pe a, Argentine striker-in minute 13-naah box chhung chiah aṭangin mawi zetin a pet lut. Minute 58-na a ni a, Silva hun a thleng, Portugal international midfielder hian Blues player hrulah Aguero tan ball a lir lut a, goal hmahruai khungtu hian laklawh nei miah loin a hlawi lut leh.

Guardiola nauten midfield-ah ball an inpe kual hnemin inkhel an thunun hneh viau, an vanneih ṭum chu ni se goal hnih aia tam khung thei tur an ni. Second half-ah bench aṭangin Gabriel Jesus luhtir a ni a, hun tawp dawn lamah captain Vincent Kompany hmel hmuh tur a awm bawk.

Blues inpeih lo
Antonio Conte-a'n Chelsea tana FA Cup nomawi a chawi aṭanga ni 78-naah chiah Wembley Stadium-ah Blues an lenglut leh a, tun ṭuma an coach erawh Maurizio Sarri a ni. Italian manager hi tun hnai kum 10 chhunga Chesea manager nghet pakuana a ni.

Napoli manager hlui hian Serie A lama a hriatchian tawh Jorginho a lalut tawh, Italian midfielder hi pre season-ah khel ṭha viau mah se Man City player ball thiam rual lakah a che thei lo, World Cup-a France champon puitu N'Golo Kante an la chhawr lo tih erawh hriat a ṭha.

Real Madrid nena sawi zawm hlawh Eden Hazard leh goalkeeper Thibaut Courtois te an la inkhel thei lo a, Barcelona hellai Willian chu bench aṭanga luhtir ni mah se training nei tam lo tih a hriat, khelmual chhungah danglamna a thlen thei bik lo.

Spain tana World Cup khel phak lo Alvaro Morata-a'n beisei a phak lo tluan chhuak zak a, kum 17 mi Callum Hudson-Odoi chu goal zawna pet thei awmchhun niin, keeper Claudio Bravo tan hna hautak a siamsak phak lo. Arsenal striker hlui Olivier Giroud a awm lo tih erawh theihnghilh sak lo ila, chutihrualin French striker hian World Cup-a an champion nan goal a khung lo.

Blues hian season ṭan hma an match hnuhnung ber atan zanin dar 12:35 hian Stamford Bridge-ah French Ligue 1 club Lyon an mikhual anga, an league match hmasa ber atan August 11 zanah Huddersfield an lenchilh zui bawk ang.

Player Inlan
Chelsea (4-3-3):
Caballero; Azpilicueta (C), Rudiger, Luiz, Alonso; Fabregas (Drinkwater 60'), Jorginho, Barkley; Pedro (Moses 79'), Morata (Abraham 69'), Hudson-Odoi (Willian 59').
Manchester City (4-3-3):
Bravo; Walker, Stones (Gomes 90+4'), Laporte (Otamendi 87'), Mendy; Foden (Diaz 76'), Fernandinho (C), B. Silva; Mahrez (Gabriel Jesus 68'), Aguero (Kompany 80'),
Sane (Gundogan 46')