Group A hmahruaitu tur Aizawl FC?

LG Independence Cup 2018-ah vawiin hian group A ten an match hnuhnung ber an khel dawn a, semifinal tur a chiang dawn. MPL kai thar Electric Veng chuan khelh tur nei tawh lo mah se knockout stage an lut tawh a, hmun ruak pakhat hi I League club Aizawl FC, Chanmari FC leh Ramhlun North ten an inchuh ang.

Vawiin tlai dar 2:00 hian Aizawl FC leh Bethlehem Vengthlang te an inkhel dawn a, I League club hian point an hmu hrim hrim a nih chuan zan dar 7:00-a inkhel tur Ramhlun North leh Chanmari FC-te beisei a tawp nghal dawn.

Point 3 a beiseiawm

Aizawl FC-in MFA Super Cup semifinal-ah Chanmari FC an hneh lo a, I Day Football match hmasa berah Electric Veng an hneh lo leh bawk. Season liam ta I League best coach Gift Raikhan-a'n Mizo club enkawlah harsatna a nei tih theih turin result an nei ṭha lo.

Amaherawhchu, I League club hian tun inelna match hnihna aṭangin team dang daih an ni tih an rawn lantir a, Chanmari FC lakah 6-0 ngawtin an chak a, an hmel lan dan a dang nghal. Aizawl FC-in match hnuhnung berah anni aia point hmu tam Ramhlun North lakah chak an mamawh a, point thum hlu tak an hlawhchhuah avangin kawng hau tak an paltlang tawh.

Vawiin hian AFC tan Bethlehem Vengthlang draw a tawk a, point la hmu lo BVT hi MFA Super Cup-ah Gift Raikhan-a hote hian 5-0 in an hneh tawh a, chuvangin semifinal beiseina nei chunga khel tur I League club hi BVT tan dal theih a nih a rinawm loh. Aizawl FC hian group hmahruaitu ni tura an mamawh zat point thum pawh an hlawh chhuak ngei a beiseiawm.

In enchhinna

Group A inkhel hnuhnung bera Ramhlun North leh Chanmari FC te inhmachhawn tur hi inelna ṭan hma chuan semifinal lut tur zawnna tur a nih a rinawm a, amaherawhchu tunah chuan inkhel hmuhnawm tura beisei hi engmah lo maiah a chhuak awn niin a lang.

Ramhlun North leh Chanmari ten tumah dem theih an nei lo a, Aizawl FC hnehtu Electric Veng lakah point khat ve ve chauh an hlawh chhuak. An tihsual siam ṭhat nan AFC hneh a ngai a, amaherawhchu MPL kai thar tih theih ang hi an ti ve thei lo a, Bethlehem Vengthlang kutah an innghah a ngai a ta thung.

BVT tan Aizawl FC hneh a beiseiawm loh avangin zanina Ramhlun North leh Chanmari FC inkhel hi coach pahnih tan inenchhinna remchang a nih ngei ang.