Czech MotoGP pakhatna Dovizioso

Ducati rider Andrea Dovi­zioso chu Pathianni zana tlan zawh tak Czech Republic Grand Prix-ah pakhatna ni a, MotoGP season kal laiah vawi hnih hnehna a channa chiah niin, championship table-ah pathumna dinhmun a luah mek.

Qualifying lam a tlan ṭhat avangin a hmasa ber (pole po­sition) aṭangin bul a ṭan a, a teammate Jorge Lorenzo-a'n rawn tlan pel ve mah se, Italian rider hian Spanish rider a tlan pel ve leh a, minute 41 leh second 7.728 chhungin hnehna a chang.

Intlansiak thlir kirin kum 32 mi Dovizioso chuan, "Rider tin khan kan tyre hnung lamah harsatna kan nei ṭheuh a, chutiang chunga hnehna ka chang thei hi ka lawm takzet," tiin a sawi.

Dovizioso hnung chiahah hian Lorenzo a thleng ve bawk a, an inthlauhna chu second 0.178 chiah a ni. Champion lai Marc Marquez-a'n a vawi 100 nan MotoGP inelna a hmachhawn a, Honda rider hian pathumna luahin a hma a mi chu second 0.368 in a phak lo.

Lorenzo hian season tawp rualin Ducati a chhuahsan dawn a, Marquez awmna Honda a zawm ang. Tunlai rider hmuhnawm pahnih team khata an awm dun tur hi team dang tan el pui an hautak khawp ang tih a rin lawk theih.

Champion lai leh cham­pion­ship hmahruaitu ni bawk Marquez chuan, "Tun ṭumah chuan Ducati an che ṭha zawk tih phat tur a awm lo. Mahse, kei chuan hma ka hruaina sawhngheh ka tum a, ka ti hlawhtling," tiin a sawi.

Season kal laia vawi nga chak tawh Marquez hian point 181 hmuin a nomawi kawl lai humhim turin a dinhmun a ṭha leh tawh hle a, Yamaha rider Valentino Rossi (132points) chu amah hnaih bertu a ni. August 12 tlai hian Austrian Grand Prix an tlan leh ang.

Czech Republic Grand Prix Results
# Rider Ram Team
1 Andrea Dovizioso Ita Ducati
2 Jorge Lorenzo Spa Ducati
3 Marc Marquez Spa Honda
4 Valentino Rossi Ita Yamaha
5 Cal Crutchlow GB LCR Honda
6 Danilo Petrucci Ita Ducati
7 Johann Zarco Fra Yamaha
8 Dani Pedrosa Spa Honda
9 Alvaro Bautista Spa Ducati
10 Andrea Iannone Ita Suzuki
Rider Championship Standings
# Rider Ram Team Points
1 Marc Marquez Spa Honda 181
2 Valentino Rossi Ita Yamaha 132
3 Andrea Dovizioso Ita Ducati 113
4 Maverick Vinales Spa Yamaha 109
5 Jorge Lorenzo Spa Ducati 105
6 Johann Zarco Fra Yamaha Tech3 97
7 Danilo Petrucci Ita Ducati 94
8 Cal Crutchlow GB LCR Honda 90
9 Andrea Iannone Ita Suzuki 81
10 Jack Miller Aus Ducati 61