Daniel Ricciardo a chhuak dawn
Formula 1 team Red Bull chuan an driver duhlai Daniel Ricciardo an chân dawn. Ricciardo hian tun season tawp ruala tawp zui ve tur a contract neih lai pawhsei a tum lo a, season tharah chuan Renault a zawm rin a ni.
Kumin July thla khan Red Bull team boss Christian Horner chuan an driver hian contract a ziak thar dawn hnai niin a lo sawi tawh, mahse driver leh team hian inremna an siam mai thei lo a, kar tawp khan an inṭhen tur thu hi a chiang.
Kum 29 mi Ricciardo hian Red Bull car a khalh chhungin Formula 1 inelna huangah podium vawi 29 lawn tawhin vawi sarih hnehna a chang tawh a, season kal laiah ṭum hnih chak tawhin driver championship lamah pangana a ni mek.
Horner chuan an driver thutlukna an zah sak thu a sawi a, "A chhuak dawn, kum tharah chuan Renault a zawm a rinawm," a ti. Tun season China leh Monaco GP-a pakhatna hi Mercedes leh Ferrari te nen pawh sawi zawm a lo ni tawh bawk.
Red Bull hian Ricciardo chân dawn mah se tunlaia driver beisei awm bera sawi ngam Max Verstappen an la nei, Dutch tlangval hi nikum favang lai khan contract duhawm an ziahpui tawh a, tunah hian champion lai Lewis Hamilton leh Sebastian Vettel te hnungah awmin F1 driver zinga hlawh hnem pathumna a ni.