Chhinga Veng an chak phawt

Cricket Association of Mizoram hnuaia I Division club pariatte inelna First Division One Day Tournament 2020 chu nimin khan match hmasa ber khelh a ni a, tualchhung team ṭha pahnih inkhelah Chhinga Veng chuan Ramhlun Venglai chu wicket riatin an hneh.

Ramhlun Sports Complex-a inkhelah Chhinga Veng lam hi ṭhum vawrah vannei zawkin vawm hmasak an thlang. Ramhlun Venglai lamin Lalchhandama Sailo an ngam lo, Chhinga Veng bowler hian over 4.2 a vawmah run nga chauh pein wicket thum a la!

Ramhlun Venglai lam hian over 36.2 aṭanga run 86 chauh siamin an thi kim. Chhinga Veng tan target sang a ni lo, over 10.3 lekah run 92 hlap chhuakin hnehna an chang a, mi pahnih chiah an inhloh a ni. Inelnaah hian team pariat an inlan a, group pahnihah ṭhenhran an ni. Group A-ah Ramhlun Venglai, Durtlang, Zemabawk Pitchers leh Chhinga Vengte an awm. Group B lamah Kulikawn, Chanmarians, Gorkha leh Zarkawt Lords te an awm thung.

Group pakhata mi hi vawi khat ṭheuh an inkhelh kual hnuah a sang ber pahnihten final an khel dawn a ni, vawiin hian group B lamin an match hmasa ber an khel ve thung ang.