Momota hun a thleng ta

Kento Momota chuan Shi Yuqi chu 21-11, 21-13 a hnehin Badminton World Championship no­mawi a chawi a, Japanese shuttler zingah ani chiah hi hetiang dinhmun luah thei a la awm.

Nanjing, China-a inelna neihah Momota hi a khel ṭha chho hle a, final-ah pawh harsatna a tawk lo. Final-a a khingpui Shi pawh hian a match hmasa lamah Chinese legend Lin Dan leh Olympic champion Chen Long te a hneh theih bawk avangin player khel ṭha pahnih an ni.

Kum 23 mi Momota hian tun hma lamin badminton court pawnah harsatna a lo tawk tawh. World number 2 ni chungin Rio Olympics-ah khan inlan tur a ni a, mahse dan phal loha pawisa thapna hmunah a kal tih hriat a nih avangin Japanese badminton hruaitute chuan kum khat chuang an hrem.

Hrem a nihna a hman zawh hnuah Momota theihna thup reng theih a ni lo a, player ṭha rual an kimna hmun Badminton World Championship-ah a theihna tak a rawn par chhuah tir leh ta a ni.