Hockey thiam ber Netherlands

Netherlands nulate chuan Ireland mumang tih tawp sakin 6-0 in an sawp a, Dutch star rual hian a vawi riat nan Women's Hockey World Cup champion an ni - anni aia record nei ṭha an awm lo.

Pathianni zan Lee Valley Hockey Center-a inkhelah Lidewij Welten, Kelly Jonker, Kitty van Male, Malou Pheninckx, Marloes Keetels leh Caia van Maasakker ten goal khat ṭheuh an vaw lut a, an goal hnuhnung pali hi minute sarih chhunga lut a ni!

Graham Shaw naute hian tun World Cup-ah hian match ruk an khelh aṭangin goal 35 teh meuh an khung a, an mahni lamah goal thum bak a lut lo. Goal riat khungtu Van Male chu top scorer niin, inelna hrang hranga match 32 chak zawn tawh Dutch team hi champion phu ber an ni chiang hle.

World number 16 hi Ireland hi tun World Cup khel zingah ranking hniam ber dawt an ni a, 2002 hnu lamah World Cup an vawi khat khelh lehna chiah niin, tun hma lama an sulhnu ṭha ber (11-na) chu an khum chho hneh ve hle bawk a ni.

Inelnaah hian India pawh an inlan a, Mizo nula Lalremsiami Hmar telna team hian quarterfinal inhlangkai ve mah se, penalty shootout-ah Ireland hi an ngam lo.