Aizawlah Silai Inkahsiak Runpui
2nd Zaua Memorial 6th North East Zone Shooting Championships official practice chu nimin khan zawh a ni a, vawiin aṭangin intihsiakna ṭan a ni dawn.
Mizoram Rifle Association (MRA) shooting gallery, Dengṭhuama Multipurpose Hall-ah 10 meters air rifle leh air pistol inelna neih a ni ang a, 3rd Battalion MAP firing range, Mualpuiah firearm 25 meters leh 50 meters inelna neih a ni ang.
Hming put dan
India hmarchhak huapa silai inkahsiakna hi February 2013 khan Mizoramah chief minister Lal Thanhawla fapa Lalthanzaua hming chawiin, Zaua Memorial North East Zone Shooting Championship chu Mizoram Rifle Association-in Aizawlah an buatsaih.
Hmarchhak state hrang hrangah kumtin neih chhunzawm chhoh zel a ni a, kumin hi a vawi rukna chiah niin Mizoramin a thlen vawi hnihna a ni a. Chuvangin a hming hi 2nd Zaua Memorial 6th North East Zone Shooting Championship tia a hming vuah a ni.
State hrang hrang
Inelna hmachhawn turin Assam aṭangin shooter 84, Manipur aṭangin 64, Meghalaya aṭangin 30 leh Nagaland aṭangin pathum an inziaklut tawh a. Mizoram aiawha tel tur mi 79 te nen mi 260-in silai an inkahsiak dawn.
Mizoram aiawha tel tur hian district level competition-a tiṭha zual thlan chhuah phawt an ni a. District hrang hrang aṭanga tiṭha zual te hi State Championship-ah tel lehin, NRAI (National Rifle Association of India) in zonal level-a tel thei tura qualifying score a siam hmu tling te chauh state aiawh tur hian thlan chhuah ṭhin an ni.
Mizoram lam hi
Mizoram hian shooting sports hi a hmelhriatna a la rei lo, kum 2006 khan mi ṭhahnemngai ten Mizoram Rifle Association an din a. Mi nawlpui rilru kuai her turin shooter naupang zawkte an chher a, shooting competition an buatsaih ṭhin. Kum 2010 khan target shooting a hman chi bik, Olympic Games-ah te pawh an hman ṭhin German siam FWB air rifle pathum leh Austria siam Steyr air pistol pahnih a nei a, hmasawnna a awm nghal.
A kum leh 2011-ah a vawi khatna atan Mizo shooter-te national level a tel turin mi 4 an in kap tling nghal. Club leh mimal angin silai nei an awm chho zel a, kumtin national shooter an pung zel bawk. Kum 2017 thleng khan mi 20 chuang National Championship-ah Mizoram hmingin an chhuak.
MRA-in silai chi hnih chauh a neih avangin category pahnih Air Rifle leh Air Pistol-ah chiah telin category tam zawkah an tel thei lo a, tel theihna category-ah erawh an che ṭha ṭhin. North East inelna vawi nga neih tawhah a hmasa berah Mizoram champion nghalin a hnu lamah erawh category tam zawka an tel theih loh avangin pakhatna an ni leh tawh lo.
Kumin hian MRA in .22 Standard Pistol a neih thar bakah Aizawl District Rifle Association hruaitu ṭhahnemngai te zarah pistol pakhat dang ADRA in a neih belh a. Kum danga la tel ngai lohna 25 Meters Standard Pistol category-ah Mizoram team aṭangin mi 10 in an kap thei dawn a, silai neih loh avanga tel theih lohna category erawh a la awm nual thung.
National Shooter zawnna
State hrang hrang aṭanga silai kap thiam thlan chhuahte hian silai chi hrang hrang–firearm rifle leh pistol, air rifle leh air pistol te hmangin kar khat chhung National Championship a qualify tumin an intihsiak dawn a ni. Category hrang hranga Mizoram aṭanga tel tur zat leh National Shooter ni tura qualifying points hmun ngai zat.
Categories Tel tur zat National Qualifying Points
Senior Juniors Veteran
Men Women Men Women Men Women
Air Rifle (10m) 38 382/400 380/400 372/400 373/400 372/400 373/400
Air Pistol (10m) 12 365/400 355/400 360/400 345/400 360/400 345/400
Standard Pistol (25m) 10 263/300 NA 250/300 NA NA NA
Peep Sight rifle, Prone (50m) 8 565/600 555/600 555/600 545/600 550/600 540/600
Open Sight rifle, Prone (50m) 8 NA NA NA NA NA NA
3-Position rifle (50m) 3 540/600 530/600 520/600 515/600 NA NA
(NA: National-a category awm lo)
Mizoram aṭanga National qualify tawhte
# Hming Veng/Khua
Mipa
1 Abednago Lalrempuia Chhinga Veng
2 C. Lalbuatsaiha Venghlui
3 Erast Lalhruaimawia Khatla
4 Isaac Zolura Tochhawng Bawngkawn
5 Lalruattluanga Electric Veng
6 PC Lalrinfela Salem Veng
7 Ramnunsanga Electric Veng
8 Reuben Lunglei Venglai
9 Vanromawia Tochhawng Bawngkawn
Hmeichhia
1 Agnes VL Neihthangi Khatla
2 Jessica Lalchhuanawmi Mission Vengthlang
3 Lalhlimpuii Bungkawn
4 Lallawmzuali Zadeng Venghlui
5 Lallianpuii Electric Veng
6 Lalremmawii Chhinga Veng
7 Lalremtluangi Chaltlang
8 Lalremtluangi Fanai Chaltlang
9 Lalrinawmi Sailo Electric Veng
10 Lalrinfeli Hrahsel Electric Veng
11 Malsawmthari Renthlei Tuikhuahtlang
12 Samjhana Thapa Zotlang
13 Vanlalawmpuii Sailo Kanan