India rawlthar ten result duhawm an nei

Football khawvel barakhaihin Indian rawlthar rualten result duhawm an nei a, Indian football-in hun duhawm a tawng chho leh ta.

India Under 16 chuan WAFF Under 16 Championship-ah Asian Under 16 champion lai Iraq chu 1-0 in an hneh a, India Under 20 chuan 2-1 in Argentina U20 an hneh bawk!

Mizo rawltharte telna

India U16-ah hian Serchhip midfielder Eric Remruatpuia Chhangte, Lunglei goalkeeper Lalbiakhlua Jongte, Lengpui midfielder Lalrokima leh Armed Veng rawlthar Lalchhanhima Sailo te an awm a, Under 20-ah Vaivakawn rawlthar Lalengmawia a awm bawk.

Iraq ngamtu

India U16 hi Malaysia-a khelh tur 2018 AFC U-16 Championship atana inbuatsaih an ni a, September aṭanga neih ṭan tur inelnaah hian Group C-ah Iran, Vietnam leh Indonesia te nen an awm ho a, a harsa dawn.

Hei vang tak hian AIFF chuan Indian rawlthar rual te hi inbuatsaihna ṭha zawk nei turin a duh a, WAFF U16 Championship hi khel turin a tir. India hian match hmasa berah Vikram Pratap Singh hattrick hmangin Jordan chu 4-0 in an sawp.

Match hnihnaah Japan lakah hmahruaina goal an khung chungin 2-1 in tlawm mah se senior level-a ram pahnih inthlauhna thlirin India hian an khel ṭha hle. Asian U16 champion lai Iraq lakah pawh Indian rawlthar rual an hmuhnawm a, Bhuvenesh chuan goal awmchhun hi a khung.

India tan Lalbiakhlua Jongte chuan inkhel bul ṭanin si ban a nghak a, Lalchhanhima Sailo pawhin inkhel bul ṭanin a khel ṭha hle - bench aṭanga luhtir Lalrokima a hmuhnawm a, Lengpui rawlthar hian a vanneih ṭum chu ni se goal khungna remchang a nei.

WAFF U16 Championship hi league anga khelh a ni a, Japan chu hmahruaitu an ni mek. India hian vawiinah Yemen an hmachhawn dawn a, hnehna an chan chuan pahnihna nichungin tournament an mangṭha ang.

Argentina an tlawm!

India coach Stephen Constantine-a'n, "India Under 17 hi engvanga sawi vul chuk nge kan nih ka hre lo," tiin nikuma World Cup khel India U17 team a sawisel a, a hnu lawkah a chhanna erawh a hmu nghal.

Nikuma India U17 player tam zawk telna India U20 chuan Indian football tan hmabak a eng tih an pholang a, khawvela team ṭha ber pawla ngaih Argentina U20 chu 2-1 in an hneh a, Deepak Tangri leh Anwar Ali ten goal an khung.

COTIF Cup 2018-ah hian India hian Murcia U20 (2-0) leh Mauritania U20 (3-0) an hneh loh hnuah Venezuela U20 chu goal khung loin an inhnehtawkpui a, match tawp berah erawh team ṭha bera ngaih Argentina an hneh thung.

Argentina U20 hi an player langsar ni ṭhin Pablo Aimar leh Lazio wingback hlui Lionel Scaloni te kaihhruaina hnuaia khel an ni a, India hmachhawn team hi U20-a an regular player-te niin rawlthar beiseiawma an sawi Matias Palacios leh Facundo Colidio pawh an inlan a, India tan chuan result duhawm tak a ni.

India hian match hmasa pahnihah result an neih ṭhat loh avangin COTIF Cup-ah erawh beisei tur an nei tawh lo a, Argentina erawh semifinal an lut thung - India tan erawh tournament chhinchhiah tlak a ni a, Argentina an hneh miau avangin coach Floyd Pinto-a'n a sawi ang ngeiin, "Indian football hun tawn duhawm ber zinga mi," a ni a, he hnehna hi hriatreng a ni tawh ang.