Spurs ngamtu Chelsea tan final a hnai

League Cup semifinal-ah London derby kan hmu a, Chelsea-in Tottenham Hotspur lakah inkhel an thunun tluan chhuah zak avangin beisei angin a hmuhnawm tawk lo thung.

Chelsea hian 2-0 in an mikhual Spurs hi an hneh a, Kai Havertz leh Ben Davies (own goal) ten goal khat ve ve an khung - Spurs-in an mikhualna ramah a chhanletna tur an nei lo.

Blues tan thlamuang taka awm erawh a la rem lo a, January 12 zanah second leg khel turin Spurs hi an lenchilh leh dawn - thil la danglam thei a ni.

Tun hnaia Sky Sport interview-a Inter Milan a ngaih thu sawitu Romelu Lukaku chu Thomas Tuchel-a'n match khat a chawlhtir hnuah a lo kir leh ta a, goal erawh a keng tel lo.

Chelsea an thiam
Liverpool nena inhnehtawk hlim Chelsea-in League Cup final khelh ngei an duh a, Stamford Bridge-ah inkhel bul an ṭan ṭha hle - minute ngana lekah Havertz chuan goal hmahruai a rawn khung.

Chelsea-in ball an chang tam a, Spurs an che hleithei lo. Minute 34-naah mualneitu team bawkin goal an khung leh a, hei erawh Spurs defender Davies-a'n an lama a tih luh a ni.

Tottenham tana tlarhnunga Davies-a dinpui Japhet Tanganga chuan a ṭhianpa hi ball a tauh per a, Spurs keeper che ṭha tak Hugo Lloris tan dan hman a ni lo.

Blues-in minute 35 pawh a tlin hmain goal hnih an khung der a, mahse, hun tawp thlengin goal dang erawh an khung thei lo - an vanneih zan ni se, goal tam zawka chak thei an ni.

Aw Lukaku!
Pound maktaduai 97.5 man Lukaku hi tun hnaiah Sky Sport Italia chuan an kawm a, Blues-a a dinhmuna a lungawi loh thu te, Inter Milan a ngaih thute a sawi.

Fans an thinrim a, coach Thomas Tuchel pawhin, "Kan mamawh loh benchheng a siam a ni," a ti a, Liverpool nen an inkhelah Chelsea player man to ber hi squad-ah a telh loh zui.

Mahse, Lukaku leh Chelsea an inbia a, Belgian striker hian a hnuah ngaihdam dilna a ti chhuak. Kum 28 mi striker hian, "Inter ka mangṭhana a ni a, Chelsea zah lohna a ni lo," tiin a sawi.

Tuchel-a'n Lukaku a ngaidam a, Spurs lakah bul a ṭan. Mahse, Manchester United striker hlui hian fan-te hlimna a thlen thei lo - vawi tam chance a nei a, injury time-a Lloris-a zawn taka a pette chu uiawm tak a ni.

Hmabak ngah Spurs
Chelsea coach hlui Antonio Conte-a'n Nuno Espirito Santo thlaka Tottenham a enkawl hnuah Spurs-in nasa takin hma an sawn a, Chelsea an hmachhawn hmaa an match hnuhnung 11-ah vawi khat chiah an tlawm.

Mahse, team ṭha Chelsea lakah insiamṭhatna tur an la ngah tih a lang a, kawng tinrengah Blues an phak lo a, an goal chhuah pahnih pawh an player-te tihsual vang liau liau a ni.

Havertz-a'n goal hmahruai a khung dawn khan Emerson Royal-a ball pek chu Tanganga-a'n dawng fuh tawk loin, Alonso chuan a chhuhsak a, Havertz a pek hnuah German attacking midfielder shot chu goal line aṭangin Davinson Sanchez chuan a pet chhuak thei lo.

Goal hnihna luh dan lah fiamthu ang mai a ni - Hakim Ziyech-a freekick chu Davies leh Tanganga ten tauh an tum ve ve a, lai angreng taka Davies-a tlan chu Tanganga hian tauh perin a goal a ni.

Hmabak a tam
Tottenham boss Antonio Conte chuan, "Dawhtheihna kan mamawh a, keimah ngei pawh hian ka mamawh. Hmasawnna tur tam tak kan la neih avangin a khawi ber hi nge kan en hmasak dawn pawh hriatthiam a har.

"Hun leh dawhtheihna hi kan mamawh ber chu a ni. Tun hnai kum chhungin Spurs hi a tlahniam nasa hman a, game tina theihtawp kan chhuah zel a ngai a ni," a ti a, "Transfer pahnih khat hmanga thlak danglam theih a ni lo," tiin thlasik transfer chungchang a sawi zui bawk.

Chelsea boss Thomas Tuchel chuan, "Result-in kan game a pholang a, chak kan phu a ni. Kha aia tam zawk goal khung thei kan ni a, mahse, Spurs laka goal khung hi chu a har ṭhin a ni," a ti.

Tuchel chuan Lukaku chungchang sawi zuiin, "Romelu hi pressure vangin a buai ve ngai lo a, harsa tak karah pawh a paukhauh tlat zel. A khel ṭha takzet a, chance a neih piahlamah tlarhnung a pui ṭha hle a ni," tiin a striker a fak.

Carabao Cup Semifinal
January 5, Nilaini Zan - First Leg
Chelsea 2 - 0 Tottenham Hotspur
CHE: Kai Havertz 5'; Ben Davies 34'

January 12, Nilaini Zan - Second Leg
Tottenham Hotspur 1:30 AM Chelsea

January 13, Ningani Zan - First Leg
Liverpool 1:15 AM Arsenal

January 20, Ningani Zan - Second Leg
Arsenal 1:15 AM Liverpool
*Liverpool vs Arsenal hi Covid-19 vangin First Leg khelh hun sawn a ni.