Djokovic an khung hrang

Novak Djokovic-a'n Melboure khawpui thleng tawh mah se a la zanlen thei lo. Sorkar hotel-ah khung hran mek a ni a, a danhremi in court lama thu a thlen chu January 10, Thawhṭanniah chinfel a ni ang.

Australian Open khel tur hian Covid-19 laka invenna lak a ngai. Vaccine la lo an nih chuan taksa hriselna kaihhnawih vanga la lo an ni tur a ni a, an lak loh chhan hi Tennis Australia leh Victoria state sorkar hnuaia endiktuten an pawm a ngai.

Independent medical panel chuan Djokovic hi Australian Open khelh an phalsak a, visa pawh a hmu. Phalna a hmuh ang hian Melboure pawh a pan ngei mai, mahse Australian mipui lam aṭangin sawiselna a nasa hle.

Sports chauh a ni tawh lo, politics a inrawlh takah chuan Australian prime minister Scott Morrison chuan, "Djokovic-a visa chu cancel a ni. Dan chu dan a ni a, a bik takin ramri bawr velah a a nihna a pawimawh zual.

"Dan leh hrai khauh tak kan neih avang hian Australia chu Covid-19 kai zat aṭanga chhutin mitthi tlem ber ram kan ni a, hei hi kan chhawmnung tur a ni, tumah dan chunga leng kan awm lo," tiin a sawi, mipui lawm loh leh duh loh zawnga thil tih chu a ngam lo.

Australian Open champion lai Djokovic khung hran a ni a, kawng sialsaktu Tennis Australia (TA) chungah zawhna a tam. TA hian Djokovic chauh ni loin player dang 26 zet chu ngaihhnathiamna pek an ni, an ti. Mahse, heng player an sawite hi tute nge an nih hriat a ni lo.

Australia sorkar hi hripui leng inkaihhruaina chungchangah an kal filawr thei hle. Ram chhung mipui te khauh taka khuahkhirh an nih laiin, ram dang mi vaccine la lo an zin lut thei hi an lungawi lo a ni - an ram inkaihhruai dan chhut chuan mipui thinrim hi an demawm loh.

Nikum tawp lam aṭang khan Australian Open khel tur chuan vaccine lak a ngai tih hi puanzar a ni tawh, a khat tawkin an puang nawn fo. Mahse, world number 1 Djokovic hi invenna hi a la duh lo, a nomawi a humhim thei lo a nih pawhin a mak lo ang.

Rafael Nadal erawhin vaccine hi a la kim tawh a, inelna hmachhawn turin Australia ramah zalen takin a awm tawh. Spanish star chuan, "Kum hnih chhungin hripui vang hian mi tam tak an thi tawh, vaccine lak hi kan tih theih awmchhun chu a ni," a ti.

Nadal chuan sawi zawmin, "Novak hian duh ni se chuan buaina nei miah loin Australian Open a khel thei. Mahse, mimal zalenna a ni a, chutih rualin zalenna kan hman dan hi thil dang nen a inmil lo thei ve bawk.

"A chunga thil thleng hi a pawi ka ti, chutih rualian tun hnai ni loin tun hma deuh khan lo chinfel lawk vek theih thil a ni," a ti. Nadal, Djokovic leh Roger Federer te hian Grand Slam nomawi 20 ṭheuh an kawl mek a ni.