Junior Basketball-ah Mizoram che ṭha

71st Junior National Basket-ball Championship 2022-ah Mizoram chuan group stage-a an khingpui Puducherry, Andhra Pradesh leh Bihar te an hneh vek. Inelna hi Indore, Madhya Pradesh-ah neih a ni a, nimin khan Mizoram hian group match hnuhnung berah Bihar chu 61-39 in an sawp.

Group match hnuhnung berah hian Mizoram hi quarter khatna aṭanga a tawp thlengin an chungnung a, Bihar an hneh theih nan Nicholas Lalmuanpuia (13 pts), Rinmuanpuia Chhangte (12), Emmanuel VL Awmpuia (11) leh Moses Lalmuanzova (10) ten point 10 an khung tling vek.

Mizoram coach Vanlalnun-sanga a damloh avangin group match hnuhnung berah team a ho thei lo a, assistant coach Ricky Lallawmkima leh manager Michael Zohmingsanga hoin an khel.

Ramthar Veng tlangval Ricky Lallawmkima chuan, "Kan ṭawngṭai nasa a, tun hun kan thlen theih chhan hi Pathian ṭanpuina liau liau a ni. State dang team hi an lian vek a, a te deuh pawh feet ruk an nih zel avangin khelh an har hle. Amaherawhchu kan naute an huaisen a, an khelh danah fak an phu hle," tiin Vanglaini a hrilh.

Mizoram assistant coach chuan sawi chhunzawmin, "Kan naute hi an shooting a ṭha tlang a, hei hi kan chakna hnar pakhat a tling. Team angin kan khel a, kan passing a ṭha a, kan khelh danah kan lungawi hle," tiin a sawi a, anmahni ṭawiawmtu Indore-a Mizote chungah lawmthu a sawi tel bawk.

Mizoram hi Level 2-ah an awm a, hetah hian team 12 chu group thumah an ṭhen. Inelna buatsaihtu Basketball Federation of India (BFI) hian nimin tlai thleng khan fixtures an la ti chhuak leh lo a, he thu ziah lai hian Mizoram hmachhawn tur a la hriat loh.

Tun ṭum inelna Junior National Basketball Championship-ah hian team 27 chu Level 1 leh Level 2-ah te ṭhen an ni a, Level 1-ah hian team 15 awmin group pangaah ṭhen an ni.

Mizoram Squad
1 Lalruatkima (C) Zarkawt
2 Vanlaltluanga (VC) Saron Veng
3 Emmanuel VL Awmpuia Nursery Veng
4 K. Lalrinhlua Mission Veng
5 Lalhmangaihzuala Khatla East
6 Lallianmawia Chawnpui
7 Lalrinhlua Khatla
8 Lawmsangzuala Ramhlun North
9 Moses Lalmuanzova Chanmari/Bawngkawn
10 Nicholas Lalmuanpuia Vaivakawn
11 Rinmuanpuia Chhangte Salem Veng, Lunglei
12 R. Laldinliana Ramhlun Sports Complex

Coaching Staff
Manager Michael Zohmingsanga Khatla
Coach Vanlalnunsanga Khatla East
Asst. Coach Ricky Lallawmkima Ramthar Veng