Hnehna nen Nadal a inlar

Rafael Nadal chu Covid-19 lak aṭangin a filhlim tawh. Nimin khan Australian Open 2022 atana inbuatsaih nan Melbourne Summer Set Tournament-ah a match hmasa ber khelin, a khingpui Ricards Berankis chu 6-2, 7-5 in a hneh.

Spanish star hi season hmasa tawp lamah khan a hliam a, hripui a kai bawk avangin a inkhel tam lo. Nikum August thla hnuah tun ṭum hi ATP Tour bika singles match a khelh lehna hmasa ber a ni hial.

Grand Slam vawi 20 champion tawh Nadal hian tun thla chawhnu lama khelh tur Australian Open khelh ngei a tum a, major title lak hnem lama a tluk pui Roger Federer leh Novak Djokovic te khum a tum dawn a ni.

Nadal hi tunah chuan kum 35 mi a ni tawh, a vanglai pel tawh mah se hliam a neih loh chuan player hlauhawm berte zinga mi a la ni phak. A match lehpekah chuan tualchhung tlangval Alexei Popyrin nen an inkhel leh ang.