Bagan leh Hyderabad an inhnehtawk

Nilaini zan Indian Super League inkhelah ATK Mohun Bagan-in vawi hnih ngawt hma hruai mah se, Hyderabad-in an sut zo zel a, hun a tawp meuh chuan team pahnih hi 2-2 in an inhnehtawk.

Bagan tan David Williams chuan second 12-na lekah goal hmahruai a rawn khung a, ISL-a goal rang ber record thar a siam - Jerry Mawihmingthanga record a khum.

Jerry hian 2017-18 season-ah khan Jamshed-pur tana khelin Kerala Blasters lakah second 22 chhungin a khung a, he record hi Australian striker hian a rawn khum ta a ni.

Hyderabad tan Bartho-lomew Ogbeche chuan minute 18-naah si phurh a sut a, mahse, Bagan-in minute 64-naah hma an hruai nawn.

Euro 2020-a Finland tana inlan Joni Kauko-a ball tauh chu Asish Rai chuan an lamah a ti lut a, Juan Ferrando team hian 2-1 in hma an hruai.

Goal a lut lo zui reng a, Bagan an chak mai a rinawm hman. Mahse, Spanish forward Javier Siverio chuan hun pek belhah Hyderabad tan a khung ve leh a, a team tan point khat hlu tak a hlawh chhuak.

Hyderabad-in Bagan an draw avangin table-ah hma an hruai a, Mumbai City an lehthal - team pahnih hian point 16 ve ve an nei a, mahse, head-to-head a result ṭha zawk Hyderabad chu a chung berah an awm.