Goa-a Ronaldo limin sawisel a hlawh

Portuguese footballer Cristiano Ronaldo lim chu nikum kum tawp khan Calangute, Goa-ah tlangzarh a ni. Ṭhalaiten football leh infiamnaah beiseina an neih theih nan Manchester United forward lim hi an siam.

Goa minister Michael Lobo chuan, "India rama Cristiano Ronaldo lim an dah hmasak ber a ni a, ṭhalaite fuihtu atana tih a ni. He lim hmang hian ṭhalaiten chona thar an neih kan beisei," tiin a sawi.

Ronaldo lim hi 410 kgs-a rit a ni a, nuai 12 man bawr vel a ni. Goa sorkar hian tum ṭha tak nei mah se Ronaldo lim hian sawisel a hlawh a, mi ṭhenkhat chuan an lungawi lohna an lantir hial.

India international hlui Micky Fernandes chuan, "Portuguese-in hun rei tak min awp a, tuna sorkar thutlukna hi a na ka ti. Ronaldo hi khawvela player ṭha ber a ni a, mahse Goa aṭanga football player lim siam a awm zawk," tiin a sawi.

Calangute khuaa Ronaldo lim duh lote hian puan dum nen an lungawi lohna an lantir a, khawtual footballer aia Portugal-a player pakhat an thlang daih hi an hrethiam lo a ni.