Dani Alves a lo kir; Barca an chak

Kum nga chuang hnuah Barcelona jersey hain Dani Alves a inlar leh ta a, a lo kir lehna inkhelah Copa del Rey round of 32 an paltlang zui.

Barcelona hian third division club Linares Deportivo lakah goal an chhuah hmasa a, mahse, goal hnih hmanga chhangletin 2-1 in an chak.

Deportivo tan Hugo Diaz chuan goal hmahruai a khung a, mahse, Ousmane Dembele leh Ferran Jutgla ten goal hnihin an chhanglet a, Barca-in last 16 an lut - Inrinni zan dar 11:00-ah league match khel turin Granada an lenchilh zui ang.

Barakhaih
Barcelona boss Xavi-a'n an khingpui tur Linares Deportivo a dah sang lo a, a awm lo hran lo - Spanish third division-ah 14-na an ni mek a, Barca tlachhe lam nen pawh khaikhin chi an ni lo.

Hei vang hian Barca boss-in a starting XI-ah player inlan khat rual bul a ṭan tir a, Sergio Busquets, Ronald Araújo, Óscar Mingueza leh Jordi Alba te chu Barca tana inlan pangngai ve deuhte an ni.

Mahse, Xavi-a'n third division club a zuam sual dawn niin a lang a, minute 19-na lekah third division club tan Hugo Diaz chuan goal hmahruai a rawn khung - Barca an hawihai.

Chhandamtu
Xavi-a mutthlu rei lo. Barca legend hian danglamna thlen turin substitution siam a ngai tih a hria a, minute 45-naah player langsar Dembele, Gerard Pique leh Frenkie de Jong te chu bench aṭangin a luhtir.

Minute 63-naah Dembélé chuan si phurh sutna goal a rawn khung a, Catalan club an phur laklawh - minute ruk hnu lawkah Ferran Jutgla chuan a khung ve leh a, goal dang lut loin 2-1 in an chak.

Kum 22 mi Jutgla hian Catalan club tho Espanyol aṭangin Barca hi season ṭan dawn khan kum khat chhung atan a zawm a, reserve team lamah a hun tam zawk a hmang - senior team tan match nga a khel ta a, goal hnih a khung tawh.

A hming Alves
Barcelona fans zingah Alves hre lo an awm kher lo ang - Barca legend hian November khan free agent ni chungin a club hlui hi a zawm a, rei tak a nghah hnuah a hmangaih club tan a inlan leh ta.

Kum 38 mi full back ropui tan Barca tana match 392 a khelhna a ni a, kum nga leh thla sarih hnuah Barca tan a inlan leh tihna a ni. Kum 2016-a Nou Camp a chhuahsan hma khan La Liga nomawi paruk chawiin Champions League-ah vawi thum a champion.

Barca a chhuahsan hnuah hian Juventus, Paris Saint-Germain leh São Paulo tan a khel leh tawh a, Barca a kir leh hnua a match hmasa berah hian 88% a pass dik a, vawi sarih ngawt chance a siam hman bawk.