Donnarumma-a'n hri leng a kai

Paris Saint-Germain goal-keeper Gianluigi Donnarumma chuan Covid-19 a kai tih an tarlang, tun kar tawpa Lyon nen Ligue 1 match pawimawh an khelh hunah a inlan thei lo ang - Keylor Navas a inlan dawn tihna a ni.

Kum 22 mi Donnarumma hian nipui bazar lai khan PSG hi a zawm, number 1 ni nghal tura rin ni mah se Navas nen khelhna hmun an inchuh tawk hle. French Cup-a hnehna a chan pui hnu lawkah Italy international hian hri a kai tih hriat a ni a, a chawlh chen tur hriat a la ni lo.

PSG coach Mauricio Pochettino, "Natna hrik ngeiawm tak a ni. A tirah natna lang chhuak awm lo mah se nghawng a neih theih avangin hri kaite dinhmun kan zir chian hmasak a ngai. Inkaihhruaina kan zawm a ngai a, midangin an kai darh loh hram ka beisei," a ti.

Khawthlang lamah hripui a hluar thar leh mek a, match ṭhenkhat pawh khelh hun sawn a ngai leh tawh. Pathiannia Angers leh Saint-Etienne inkhel tur pawh a hun an sawn tawh a, match dang pawh a hun sawn theih dinhmuna ding an awm.

Lionel Messi pawhin Argentina lama thlasik chawlh a hmannaah hri leng hi a kai. Mahse, PSG forward hi a fihlim leh tawh a, tunah chuan Paris khawpuiah a thlawk lut leh tawh. Kar tawpa a inkhelh dawn leh dawn loh erawh a la chiang bik lo.