Real Madrid-in phuba an la ta

Copa del Rey round of 32-ah Real Madrid-in phuba an la a, an mikhualna ramah third division club Alcoyano chu 3-1 in an hneh.

Season hmasa khan Copa del Rey last 32-ah vek team pahnih hi an lo intawng tawh a, Alcoyano hian khawvel barakhaihin Real hi 2-1 in an hnawt chhuak.

Mak tak maiin tun season-ah Real leh Alcoyano an intawng leh a, third division team hian chelh thei viau mah se Carlo Ancelotti enkawl team an danglam tawh.

Real tan Eder Militao, Marco Asensio leh keeper Juan Jose (own goal) ten goal khat ṭheuh an khung a, Alcoyano tana Dani Vega goal mawi khungin awmzia a nei phak lo.

An che hmasa
Real-in minute 39-na lekah centre back Militao hmangin goal hmahruai an khung a, Brazilian defender hian amah ang thoa Brazilian mi Rodrygo corner pet aṭanga ball kal chu a tauh lut.

La Liga hmahruaitu mah ni se Real-in khualmualah an beisei angin inkhel an thunun thei bik lo a, Alcoyano-in season hmasaa an hneh tawh team lakah awlsam taka tlawm an tum bik lo - an huaisen tlat.

Third division club hian minute 66-naah Vega solo goal ropui hmangin an si phurh an sut ta nge nge a, Real laka a goal ropui hi a hre reng tawh ang - theihnghilh phal chi a ni tlat lo!

Alcoyano an phur belhchhah a, season hmasaa an hneh tawh hnu team hi an hneh nawn a nih ngat chuan Spanish football-ah an chanchin a chuang rei dawn tih an hria.

Team ṭha zawk
Alcoyano-in si phurh an sut a, Real an talbuai phah duh lo. Minute 76-naah Asensio chuan a thiam a la theihnghilh lo tih pholangin Real hma a rawn hruaipui a, Eden Hazard siamsak a ni.

Kum 25 mi Asensio tan tun season-a goal sarih a khungna a ni a, assist vawi khat a nei tawh bawk - heti zat goal thawk chhuak tur hian match 21 a mamawh.

Real a pan hnua beisei phak lo Hazard-a'n tun season-a assist vawi hnih a neihna a ni a, inelna hrang hranga match 16 a khelh tawh aṭangin goal khung a la nei lo bawk!

Ancelotti nauten an duhtawk lo - Alcoyano keeper Juan Jose a chesual a, kum 42 mi hian Isco ball pet tur chu va dan tum mah se a dang zo lo a, an lamah a lut a, own goal-ah a chhiar a ni.

A tawp thleng
Real boss Ancelotti chuan, "Zanina kan khelh ang match kha chu quality lam a ni lo a, chhan tam tak vangin zan danga kan khelh ṭhin match-te nen huang khata dah chi a ni lo.

"Mahse, ball kanga khelh dan, long ball pet dan leh set piece pet dan thlengin he inkhel atan hian kan zir a, kan mamawh ang takin kan khel chhuak a ni," a ti.

King Carlo chuan sawi zawmin, "Si phurh an rawn sut khan kan talbuai phah lo. Kan tih tur kan ti a, kan chak a ni. He hmunah hian theihtawp chhuah loh chuan nikum ang khan tlawm theih a ni," a ti a, an chak chu a lawm hle.

Real striker Mariano Díaz chu hliam vangin lakchhuah a ngai a, he thu buatsaih a nih lai hian a dinhmun sawi chian theih a la ni lo. Madrid khaw club hian Inrinni zan dar 1:30-ah Valencia nen league match an khel zui ang.

January 04, Thawhlehni Zan
Ponferradina 1 - 1 Espanyol
PON: Yuri 88' (P)
ESP: Adrià Pedrosa 4'
*Penalty-ah 3-1 in Espanyol an chak

January 05, Nilaini Zan
FC Cartagena 1 - 2 Valencia
FCC: Alfredo Ortuño (P) 75'
VAL: Carlos Soler 35'; Denis Cheryshev 90'
Eibar 1 - 2 Real Mallorca
EIB: Gustavo Blanco 45'
REM: Josep Gayá 68'; Ángel 82'
Leganes 2 - 3 Real Sociedad
LEG: Juan Muñoz 60', 70'
RES: Alexander Isak 8'; Mikel Oyarzabal 43', 74' (P)
Linares Deportivo 1 - 2 Barcelona
LIN: Hugo Díaz 19'
BAR: Ousmane Dembélé 63'; Ferran Jutglà 69'
Atlético Baleares 2 - 1 Celta Vigo
ATB: Manel Martínez 17', 76'
CEL: Brais Méndez 67'
Real Valladolid 0 - 3 Real Betis
REB: William Carvalho 24'; Nabil Fekir 27'; Borja Iglesias 50'
Mirandes 0 - 1 Rayo Vallecano
RAY: Andrés Martín 67'
Alcoyano 1 - 3 Real Madrid
ALC: Dani Vega 66'
REA: Éder Militão 39'; Marco Asensio 76'; José Juan 78' (OG)