Ramsey a chhuak dawn

Juventus manager Massimiliano Allegri chuan a midfielder Aaron Ramsey chu tun thlasik bazar chhungin a chhuah tur thu a sawi a, striker Alvaro Morata erawh a chhuak dawn lo tih a sawi chiang bawk.

Arsenal midfielder hlui Ramsey hian Old Lady-ah beisei a phak lo, season kal laiah phei chuan a khel phak lo. Burnley-in an ngaihven a, mahse Premier League club lian deuh zawka khelh a duh vangin a hnar niin an sawi.

Allegri chuan, "Aaron Ramsey-a'n training a rawn zawm ve leh tawh, mahse ani chu chhuak tur a ni," tiin Ramsey chungchang a sawi. 2019 aṭanga Juve jersey hatu hian Italian club tan match 69 chauh a la khel a, tun season bikah phei chuan minute 100 pawh a ka khel tling lo.

Burnley bakah hian sum ngah thar Newcastle United chu Ramsey ngaihventu zinga mi an ni a, thlasik bazar chhungin club thar chu a nei ngei ang.

Barcelona nena sawi zawm Morata erawh a chhuak dawn lo. Allegri chuan, "Alvaro nen kan inbia a, club tana a pawimawhna leh hlutna ka hrilh, ani pawhin hmabak hlen tur a la neihzia a hria, club a chhuahsan lo ang," a ti.