Gauff lakah Barty chak hram

Adelaide International khelh laiah Ashleigh Barty chuan Nilaini tlai khan a match hmasa ber a khel a, tleirawl duhawm Coco Gauff chu harsa takin a hneh hram; set a hloh hnuah a tho chhuak leh thei hram a ni.

Center Court-a inkhelah kum 17 mi Gauff hi a che fuh hmasa zawk a ni. American player hian set hmasa ber 6-4 in a lak hnuah, set hnihnaah pawh 4-3 in hma a hruai, hetih lai hian double break point a hmu bawk.

Mahse, world number 1 Barty hian break point a inchhanhim a, set hnihna a lak hnuah a tawpah chuan 4-6, 7-5, 6-1 in a chungnung zawk hram. Season bul ṭanna a nih avangin tun hma lama a ṭhat dan tak khan a la khel chhuak lo.

Kum 25 mi Barty chuan, "Hun rei tak hnuah match ka khel ve leh chauh a ni a, duhthusam loh lai chu awm ve bawk mah se ka khel ṭha thawkhatah ka ngai. Player ṭha tak ka hmachhawn avangin set ka hloh kha chu a mak hran lo.

"Coco pawh khan a khel ṭha hle a,a vanneih ṭum chu ni se chak zawk a ni hial ang, ani nena match ṭha tak kan khel thei kha ka lawm. Match tinin hmasawnna hmuh ka beisei ang," tiin a sawi.

Australian Open 2022 inbuatsaihna zinga pakhat Adelaide International-ah hian, seeded pahnihna Aryna Sabalenka chu a match hmasa berah a lo tlawm tawh. World number 2 hi world number 100 Kaja Juvan lakah 7-6 (7-6), 6-1 in a chak lo.