Zanin aṭangin Bundesliga inelna chhunzawm dawn

Kum 2022 atan Bundesliga inelna chu zanin aṭangin chhunzawm leh a ni dawn a, champion lai Bayern Munich-in zanin dar 1:00 hian Borussia Monchengladbach an mikhual ang. Bavarians hian match 17 khelh tawh aṭangin point 43 an hmu a, anmahni hnaih bertu Borussia Dortmund aiin point kuain an sang fal.

Bayern hian Glabdach hi an hneh a nih chuan inelna hrang hrangah match riat a zawna an chakna a ni dawn a, nikum November 20 khan mak taka Augsburg an hneh loh hnuah an la chak vek. Bavarians khingpui tur Gladbach erawh chak an harsat a, match hnuhnung pangaah chak an nei lo.

Glabach hi November 20-a Greuther Fürth an sawp hnuah an chak lo vek a, insiamṭhat an mamawh hle. Chutihrualin Adi Hütter-a kaihruai Gladbach tan Bayern Munich laka point hmuh a harsa dawn a, an inkhelhna tur hmun hi Allianz Arena a nih avangin hmabak a harsa sawt ang.

Amaherawhchu Bayern hi Covid-19 vangin an buai mek. Player pariat Lucas Hernandez, Tanguy Nianzou, Manuel Neuer, Kingsley Coman, Corentin Tolisso, Leroy Sane, Dayot Upamecano leh Omar Richards te chuan hri leng an kai avangin Gladbach an hmachhawn thei dawn lo.

Julian Nagelsmann tan chanchin lawmawm erawh Joshua Kimmich chu Covid-19 vanga hun rei tak a chawlh hnuah training a nei ṭha leh tawh a, player pawimawh Serge Gnabry, Thomas Muller leh Robert Lewandowski te an dam ṭha. Bayern kim lo hi Gladbach laka point thum hmu turin an ṭha tawk.