Giannis tel lohna Bucks an tlawm

Giannis Antetokounmpo tel lo chuan NBA champion lai Milwaukee Bucks tan pawh chet a harsa ṭhin. Nimin zing NBA regular season inkhelah Bucks hian Toronto Raptors chu 117-111 in an ngam lo.

Bucks thiampuipa Giannis hi damlohna vangin a inlan thei lo a, point 25 neitu Khris Middleton bak chu mimala che ṭha fal an awm thei lo; player dang panga ten point 10 nei tling ve mah se chakpui nan a tawk zo lo a ni.

Raptors lam tan point 33 neitu Pascal Siakam a langsar, ani bakah hian OG Anunoby (22 points) leh Gary Trent Jr. (22) te an che ṭha a, point 19 neitu Fred VanVleet-a'n a thawh hlawk bawk avangin, season kal laia a vawi 18 nan hnehna an chang.

Champion lai Bucks hi kuminah vawi 15 an tlawm tawh a, beisei leh duhthusam angin season bul an ṭan lo. Eastern Conference lamah pathumna an ni mek, an chungah hian Brooklyn Nets leh Chicago Bulls te an awm.

Nimin zing inkhel dangah Golden State Warriors pawh an tlawm. GSW hi Dallas Mavericks lakah 99-92 in an chak lo, team pahnih an khel ṭha tawk lo hle - khel chhe ve veah Warriors an la che chhe fal zawk.

Stephen Curry leh a ṭhiante zingah point 20 nei tling thei an awm lo a, a vawi riat nana an chak lo hi a mak lo. Chak lo mah se Steve Kerr-a naute hian Western Conference table-ah hma an hruai chhunzawm, hnehna changtu Mavericks hi pangana an ni thung.

Inkhel dangah Kyrie Irving chu Brooklyn Nets tan a inlan. Irving hian vaccine a lak duh loh avangin season tirah khan squad-ah telh a ni lo, tunah chuan an ziak lut leh hnuhnawh. Khawpui ṭhenkhatah chuan invenna a lak loh chuan a la inkhel thei dawn chuang lo.

Irving lo kir lehna inkhelah Nets hian Indiana Pacers chu 129-121 in an hneh.

NBA - Nimin Results
Detroit Pistons 111 - 140 Charlotte Hornets
Brooklyn Nets 129 - 121 Indiana Pacers
Utah Jazz 115 - 109 Denver Nuggets
Philadelphia 76ers 116 - 106 Orlando Magic
Golden State Warriors 82 - 99 Dallas Mavericks
Miami Heat 115 - 109 Portland Trail Blazers
Houston Rockets 114 - 111 Washington Wozards
Toronto Raptors 117 - 111 Milwaukee Bucks
Atlanta Hawks 108 - 102 Sacramento Kings
San Antonio Spurs 99 - 97 Boston Celtics
Oklahoma City Thunder 90 - 98 Minnesota Timberwolves