Tlai dar 2-ah Chhinga Veng Vs Chawnpui

LG Independence Cup boruak a nung chho a, champion lai Chhinga Veng meuh pawh an dinhmun a him lo. Vawiin tlai dar 2:00 hian Chhingcows-in MPL kaithar Chawnpui an hmachhawn ang a, goal hnih china an chak lo a nih chuan Lalsangzuala Hmar hote hi tla thei dinhmunah an ding. Zan dar 7:00-ah Mizoram Police leh Jamshedpur FC Reserves an inkhel ang a, tlai lam inkhel result a zirin zan inkhel hi a pawimawhin a pawimawh lo ang.

Chawnpui an chak
Thawhṭanni zan khan Lammualah Chawnpui FC leh Kanan FC te an inkhel a, MPL club-in semifinal beiseina chhi nung turin chak ngei an mamawh. Coach Lalremtluanga hoten inkhel an thunun a, first half tawp lamah pawh ball pet thiam Vanlalthanga leh David Laltlansanga te hmangin goal khung theihna hun ṭha an nei a, an hlah ve ve.

Second half-ah Chawnpui tan an veng tlangval David-a rawn inlarin goal awmchhun a khung a, inkhel tawp thlengin MPL club an chungnung a, an phu ang ngeiin point thum an hlawh chhuak. Chawnpui coach Rindika Hmar chuan, "Kanan FC hi an inrualkhat a, an che rang tlang. Mahse, game pumpui en kha chuan a chungnung zawk kan ni a, chak phu zawk kan ni," tiin point thum hmuh an phu thu a sawi.

Chhinga Veng an him lo
Chawnpui an chak chiah hian match thuma chak vek Chhinga Veng chu tla thei dinhmunah an ding a, group B aṭangin team pathumin semifinal hmunruak pahnih an inchuh.

Chhinga Veng coach Lalsangzuala Hmar chuan, "Chawnpui inkhel hi vawi thum ka thlir ta a, team ṭha tak an ni a, chetsual theihna a ni. Kei ka ngaihdan chuan MPL club tawh phawt hi chu a awlsam lo a, chuvangin kan ṭhat dan berin player ka luhtir dawn. Chawnpui hneh duhna thinglung pu 11 an lut ang," tiin Vanglaini a hrilh.

MPL nomawi vawi hnih chawi thei hmasa ber Sanga hian a tawnhriat aṭangin fimkhur a ṭul tih a hria a, an khelh dan tur hmang a sawi chiang nghal bawk. Chhingcows coach chuan, "Goal venhim tawp hi ka thiam dan a ni lo a, mipui hmuhnawm tih tura attacking game khelh hi ka duh dan a ni a, kan ṭhat dan leh thiam dan pawh a ni. Chawnpui laka point khat ringawt hmuh tum hi a him lo a, chuvangin attacking football khel chungin point thum hmuh kan tum ang," tiin chak ngei an tum thu a sawi.

Chhinga Veng squad thlirin point hmuh a harsa niin a lang lo a, amaherawhchu football-ah chuan engpawh thleng thei a ni a. Chawnpui tan semifinal luh bawk a, champion lai petchhuah tluka châkawm a awm chuang lo. MPL kaithar tana thu lawmawm chu vawiin hian Chhinga Veng defender pawimawh PC Laldinpuia chu hrem vangin a khel thei dawn lo a, position hrang hranga chhawr theih Lalrammawia a inhliam bawk.

Fuihtu ṭha
Chawnpui head coach Lalremtluanga leh coach Rindika Hmar te hi Chhinga Veng head coach leh Under 18 coach ni tawh te an ni a, an club hlui hmachhawn tur an nih avangin ṭum dang zawng aiin chak an duh ang.

Rindika Hmar chuan, "Chhinga Veng hi team ṭha an ni a, inchawina siam se la Chhinga veng lama dah an ni deuh vek ang. Kan head coach nen hian kan club hlui ve ve kan hmachhawn dawn a, Chhinga Veng player te hi Chawnpui lama kan enkawl player te ni se chuan zanah tui takin kan mu hle hle mai thei," tiin an khingpuite ṭhat sia a sawi a, an hlau tihna lam aiin pressure pek a tum tih a lang.

Chawnpui coach sawi chhunzawmin, "Kan player-te hi an ṭang a, an theihna zawng zawng an hlan a. Kan ring tawk em em bawk a ni. Football-ah chuan engkim a thleng thei, a tawp thlengin kan ṭang dawn," tiin upset thlen tir ngei an tum. MPL kaithar erawh fimkhur a ṭul, Chhinga Veng laka chak loh chuan semifinal luhna kawng a ping a, an in draw chuan Mizoram Police result a zirin knockout stage an lut thei ang.

Group B-ah hian MPL club pathum bakah ISL club Jamshedpur FC Reserves leh Aizawl DFA club Kanan FC te an awm. MPL club pahnih Chhinga Veng leh Chawnpui ten zanina Police khingpui tur Jamhsedpur an hneh ve ve a, chutihrualin an chakna zat hi goal khat ve ve chauh a nih avangin Lalbiaksanga Colney hote tan chetsual theihna a ni.

Amaherawhchu, Mizoram Police hian Chhinga Veng an hneh loh hnuah practice-na hun ṭha an nei a, zanin hian point thum chauh hlawh chhuak loin champion tur zia an rawn lantirh theih a beisei theih ang. Nikum I Day Football best player R. Malsawmtluanga leh top scorer Malsawmfela, keeper ṭha Lalmuanawma te awmna team Police-ah hian Lalfakzuala, V. Lalṭanpuia, Lalbiakhlua leh F. Lalrinpuia te an la awm reng a, football hmuhnawmna an pho chhuak thei ang.

999 a thleng thei!
Group B round hnuhnung berah Chawnpui FC-in Chhinga Veng FC an hneh a, Mizoram Police-in Jamshedpur an hneh bawk chuan MSL club pathumin point kua vek an hmu ang. 999 hi a thleng a nih chuan a hnuaia mi hi a tlang theih dan tur chu a ni.

I Day Football-ah head to head en tur a ni a, team pathum inkhelh kualna en tur a ni a. Police hian Chawnpui 2-1 in an hneh a, amaherawhchu 2-1 thoin Chhinga Veng an hneh lo thung.

1. Chawnpui 1-0 Chhinga Veng: Hetiang result hi a thleng a nih chuan Police chu hmahruaitu an ni ang. Chawnpui hian Chhinga Veng hneh mah se Police-in point kua an hmuh avangin an pahnih bik head to head chu a en theih dawn lo a, group pumpui goal difference en tur a ni ang a, Chhingcows-in semifinal an lut ang.

2. Chawnpui 2-1 Chhing Veng: Team pathum hi 2-1 vekin an inhneh kual tih a ni a, chuvangin head to head chu a en theih loh tihna a ni ang. A pumpui goal difference aṭanga en chuan Chawnpui an tla ang a, group hmahruaitu chu Mizoram Police-in Jamshedpur an hneh dan a zirin a hriat theih
chauh ang.

3. Chawnpui goal hniha chak: Chawnpui hian goal hniha an chak a nih chuan match thuma point kaw hmu thei Chhinga Veng hi an tla dawn a, MPL kaithar hi group hmahruaitu an ni bawk ang.

Group B
Results & Fixtures
28 July, Inrinni
Mizoram Police FC 2 - 1 Chawnpui FC
MPFC : Lalbiakhlua 61'; Lalfakzuala 62'
CHFC : Vanlalnghenga 7'
MoM: Lalbiakhlua, MPFC
Chhinga Veng FC 2 - 0 Kanan FC
CVFC : Vanlalzuidika 13'; Lalromawia 73'
MoM : Lalromawia, CVFC
1 August, Nilaini
Kanan FC 1 - 2 Mizoram Police
KFC : Lalhriatpuia 90+2'
MPFC : R. Malsawmtluanga 37'; V. Laltanpuia 70;
MoM : V. Lallaltanpuia, MPFC
Chawnpui FC 2 - 1 Jamshedpur FC
CHFC : Subham Ghosh 54' (OG); Lalramliana 76'
JFC : Billu Telli 35'
3 August, Zirtawpni
Jamshedpur 2 - 2 Kanan FC
JFC : Billu Teli 5'; Rakesh Yadav 84'
KFC : Joseph Lalvenhima 9'; H Malsawmtluanga 34'
MoM: Rakesh Yadav, JFC
Mizoram Police 1 - 2 Chhinga Veng FC
MPFC : R Malsawmtluanga 43' (P)
CVFC : Lalmuansanga 18'; Lalrinchhana 87'
MoM : MS Dawngliana, CVFC
6 August, Thawhṭanni
Chhinga Veng 1-0 Jamshedpur
CVFC : MS Dawngliana, 3'
MoM : MS Dawngliana, CVFC
Kanan FC 0-1 Chawnpui FC
CHFC : David Laltlansanga 62'
MoM: David Laltlansanga, CHFC
August 8, Nilaini
2:00 PM Chawnpui FC Vs Chhinga Veng
7:00 PM Jamshedpur Vs Mizoram Police

# Team Pld W D L GF GA GD Pts
1 Chhinga Veng 3 3 0 0 5 1 4 9
2 Mizoram Police FC 3 2 0 1 5 4 1 6
3 Chawnpui FC 3 2 0 1 4 3 1 6
4 Jamshedpur 3 0 1 2 3 5 -2 1
5 Kanan FC 4 0 1 3 3 7 -4 1