Group A hmahruaitu Aizawl FC

LG Independence Cup group A-ah Aizawl FC chuan hmahruaitu ni turin nimin tlai khan Bethlehem Vengthlang FC 4-0 in an hneh a, Electric Veng nen semifinal an lut.

Nizan khan Ramhlun North leh Chanmari FC te an inhmachhawn a, rinlawk ang ngeiin he inkhel result hian nghawng a nei lo.

AFC an kal fawr

I League club Aizawl FC-in Electric Veng hneh loin I Day Football ṭan mah se an elpui Chanmari FC 6-0 in an sawp thei a, match hnuhnung bera BVT an sawp hma hian Ramhlun North 2-1 in an hneh bawk.

Nimin inkhelah hian Aizawl FC tan Paul Ramfangzauva'n goal hmahruai a khung hnuin Lalkhawpuimawia leh hremna hmang zo Alfred Kemah Jaryan ten goal hnih ve ve an khung a, 4-0 in an chak.

EFC tan fiahna

Electric Vengin pahnihna dinhmun an hauh a, MPL club an nih hnuah I Day Football semifinal an thleng nghal hi hlawhtlinna ropui tak a tling.

EFC hian group stage-ah MPL club pali Aizawl FC, Ramhlun North, Chanmari FC leh Bethlehem VT an hmachhawn chungin chak hmel an hmu lo. Final lut turin group B hmahruaitu an hmachhawn dawn a, tun dinhmunah champion lai Chhinga Veng a nih hmel avangin MPL kaithar hian fiahna hau tak an hmachhawn a ṭul ang.