Number 1 Barty a tla

Australian Open inbuatsaihna zinga mi Brisbane International khelh laiah world number 1 Ashleigh Barty chu Jennifer Brady hneh loin a tla a, a match hmasa bera a chak loh avangin inenfiah a ngai hle.

Nimin second round inkhelah Barty hi 6-4, 7-6 (7-4) in a chak lo. World number 1 a nih bakah seeded pakhatna a ni bawk, first round-ah bye-in American nula hi tun inelna bika a hmachhawn hmasa ber a ni.

Player pahnih hi season liam ta khan vawi hnih an intawng, player ṭha zawk Barty hian set hloh miah loin hnehna a chang ve ve - kuminah erawh thawnthu a danglam ta.

Kum 23 mi Barty chuan, "Kum 2018 khan Brisbane-ah hian ka match hmasa berah ka chak lo tawh bawk, kha khan ka chhe ta duai tihna a kawk kher lo. Kuminah pawh a ṭha thei ang bera khelh ka tum a, tun ṭuma ka chak loh vang hian ka training leh thil tum neih dan a danglam phah lo ang," tiin a sawi.

Brady hian a match hmasa zawkah Grans Slam vawi nga champion tawh Maria Sharapova chu a lo hneh tawh bawk, tun inelna bika player hmuhnawm a ni; a match lehpek atan Petra Kvitova a hmachhawn leh ang.

Inkhel dangah Kvitova hian darkar khat leh minute khat chhungin Liudmila Samsonova 6-3, 6-2 in a hneh ve thung, season hmasa khan Czech Republic nula Kvitova hian Australian Open final a thleng a, kuminah pawh a thleng sang pawl a nih leh ngei a rinawm.

Inelna dang Auckland Classic lamah Serena Williams a vannei hlauh. American nula hian a khingpui Christina McHale lakah set hmasa hloh mah se 3-6, 6-2, 6-3 in hnehna a chang hram - a awlsam lo hle.

Grand Slam vawi 23 champion tawh Serena chuan, "Ka thil tum thleng tur chuan hetianga match hautak hi ka khelh fo a ngai," tiin Margaret Court-i record (24 major titles) nih rual ngei chu a thupui a nih thu a sawi nawn.