Chelsea goalkeeper Courtois a bo?

Football nipui bazar boruakin a vawr tawp a thleng chho mek. Premier League club zingah Chelsea chu titi ngah ber an ni. Goalkeeper Thibaut Courtois-a'n chhan hriat lohin training a zawm lo a, chhuak tura anga thawm nei lian Willian erawhin Stamford Bridge-ah a cham tur thu a tichiang thung.

Belgium international Courtois hian World Cup khelh vangin chawlh a nei rei hret. August 6, Thawhṭanni khan club training zawm tura ngaih a ni. Mahse, Blues keeper hi chhan hriat lohin a inlan lo a, goalkeeper ṭha zawng mek Real Madrid a pan ngei dawn niin a lang ta.

Spanish club lian nena sawi zawm pakhat zawk Eden Hazard erawhin training a zawm a, Belgium midfielder hma hun hi la chiang fak lo mah se London club tana training a zawm ringawt pawh hi Blues fans tan chuan thawk huaina tham a tling ngei ang.

August 9, hian England bikah chuan bazar hun a inkhar tawh dawn. European ram lian dangte chuan season dang ang bawkin tun thla chhung chu player lei nan hun an nei tlang dawn thung a, an duh chuan English club ami pawh an la thei tho a ni.

Spain lamah
Feet 6 leh 6 inches zeta sang Thibaut Courtois hian Belgian club Genk aṭangin Chelsea hi 2011 khan a zawm a, a tirah Petr Cech a tluk loh avangin intuaihriam turin Atletico Madrid-ah season thum chhung hun a hmang; 2014 khan London-ah koh kir niin, tun dinhmunah chuan EPL goal keeper ṭha berte zinga mi a ni mek.

Chelsea tan hian match 154 a khelh aṭangin clean sheets vawi 58 a nei a, goal 152 a chhuah thung. World Cup 2018-ah khan Belgium chu pathumna nihpuin, keeper ṭha ber chawimawina 'Golden Glove' hlan a ni.

Kum 26 mi Courtois hian Spain khawpui Madrid a ngainat thu a sawi fo tawh, London-a awm reng chunga hetiang thu a sawi hriat tur a awm khan Blues fans ṭhenkhat chu a ti lawm lo hle. Khawvela a ṭha ber leh an mit it zawng apiang lak tum ṭhin Real Madrid an rawn lak takah chuan Courtois a nghing hi a mak lo.

Zirtawpni khan Blues manager Maurizio Sarri chuan, "Tun dinhmunah chuan Courtois hi Chelsea player a ni. Nakinah a ni zel dawn em tih erawh ka sawi thei lo, club kutah a innghat a, a bik takin ama thutlukna a ni bawk. Kan hnenah a awm zel ka beisei," tiin a lo sawi tawh.

Manchester City nen Community Shield an inchuh hnuah Sarri hian a player nen hian phone hmanga an inbiak tawh thu a sawi leh a, hmai chhana an la inbiak tur thu a sawi bawk. Mahse, team training a zawm ni hmasa ber tura a inlan loh avangin a chanhin hian sawi zui a hlawh hle.

Willian a nghet
Shakhtar Donetsk aṭanga Chelsea zawmtu Willian hi tun nipui bazar laia player 'luck' ber pakhat a tling. Ualau takin Barcelona chuan lakluh an tum thu an kalpui a, an elpui Real Madrid bakah Manchester United te pawhin an duh nia sawi a ni bawk.

Brazil international hian World Cup khel vang thoin Blues a zawm tlai hret a, Pathianni zana Man City nen an inkhelh ṭum pawhin a bul ṭantu zingah telh a ni lo. City lakah danglamna siam lo mah se Willian hian an chak loh hnuah Chelsea fans tan lawmna tur a siam thung.

Kum 29 mi Willian chuan, "Barcelona hian min lak tumin tha an thawh ngei mai, mahse kei chuan chhuah ka tum lo tih hi ka sawi chiang duh," tiin Stamford Bridge chhuahsan a tum loh thu a sawi.

Chelsea fans lawmna tur thu sawi zawmin Willian chuan, "He hmunah hian ka inbengbel a, club lamin min hralh duh a ni lem loh chuan hmasawn tura khelh zel mai ka duh," a ti - tun boruakah chuan a chhuak dawn lo tih a chiang.

Season hnih chhunga Premier League leh FA Cup chawi thei Antonio Conte thlaktu Sarri-a'n tun nipui bazar chhung hian, Napoli midfielder Jorginho leh goalkeeper Rob Green te chiah a la lalut a, tun kar tawpah league khelh ṭan tur a nih tawh avangin kawng hrang hrangin inbuatsaih an la ngai nasa hle niin a lang.