Murray-a'n hma a sawn

World number 1 hlui Andy Murray chu a inkhelh mumal loh chhungin ranking lamah 839-na a ni hman a, tun hnaia a hliam dam tawhin nomawi la hlawhtling leh chiah lo mah se ṭha takin a khel leh tawh. Nomawi la chawi belh chiah lo nachungin result ṭha a neih vangin ranking chhuak tharah chuan 457-na a ni leh der tawh.

Kar hmasa khan Washington Open-ah Murray a inlan a, quarterfinal lut mah se last 16 an inkhel hun nen a inkar a zim lutuk avangin a inlan zui lo. August 27 aṭanga ṭan tur Cincinnati Masters-ah a inlan zui zawk dawn a ni.

US Open inbuatsaih nana hman ṭhin Cincinnati Masters-ah hian player an inlan ṭha dawn hle. Chutihrualin, player langsar zingah ranking hniam vanga seeded chang phak lo - Murray bakah Serena Williams leh Maria Shrapova te chuan duhsak bik an hlawh dawn lo, seeded an chang dawn lo tihna a ni ang.

Mipa leh hmeichhe singles-ah player 16 ve ve ten seeded an chang dawn a, world number 1 ni lai Rafael Nadal leh Simona Halep te chu pakhatnaah an awm ang.

ATP Ranking Thar
# Player Ram Points
1 Rafael Nadal ESP 9310
2 Roger Federer SUI 7080
3 Alexander Zverev GER 5665
4 Juan Martin del Potro ARG 5455
5 Grigor Dimitrov BUL 4610
6 Kevin Anderson RSA 4355
7 Marin Cilic CRO 3905
8 Dominic Thiem AUT 3665
9 John Isner USA 3490
10 Novak Djokovic SRB 3355