Newcastle striker thar Rondon

Premier League club Newcastle United chuan West Brom aṭangin striker Salomon Rondon chu season khat chhung atan loan-in an hawh a, hetihrual hian Dwight Gayle chu Championship club lamah hian loan bawkin an chhuahtir ve bawk.

Venezuela international Rondon hian season hman zawh takah khan Baggies tan inelna hrang hrangah goal 10 a khung a, Dwight Gayle hian Magpies tan goal ruk a khung thung.

Newcastle boss Rafael Benitez chuan, "Salomon ka lalut thei hi ka lawm takzet. Tlarhmaa chhawr tur player kan zawn khan tawnhriat ngah player pawimawh tur zia kan hre lawk a ni," tiin Rondon chu a thiamna piahlamah a tawnhriat ngah an chhawr ṭangkai tur thu a sawi.

Rondon chuan, "West Brom hi ka thinlungah an cham reng ang. Chutihrual chuan Premier League club lian, sulhnu nei ropui tak ka zawm thei hi ka lawm em em a ni," a ti.

Hetihlai hian Baggies pantu Gayle hian 2016-17 Championship-ah khan Newcastle United chu champion puiin match 32-ah goal 23 a khung a, West Brom head coach Darren Moore chuan, "Club pahnih duh dan takin engkim a kal a ni," tiin an player inthlengah club pahnih an lawm ve ve thu a sawi.