Europe-ah Witsel kir dawn

German club Borussia Dortmund chuan Belgium international Axel Witsel lalut turin inremna an neihpui tawh thu an sawi a, kum 29 mi midfielder hian Thawhṭanni khan Dortmund training-na hmun a tlawh.

Witsel hi Chinese club Tianjin Quanjian tan a khel mek a, a contract neihlaiah 'pound maktaduai 20 a lei duh an awm chuan a chhuak thei ang' tih a tel a, Dortmund hian heti zat sum thehchhuah hi an remtih avangin an lalut dawn a, June 30, 2022 thleng an hnena cham turin contract an ziahpui ang.

Switzerland-a pre-season an neihna hmuna Dortmund pantu Witsel chuan, "World Cup zawhah khan Europe-a kir chaknain ka khat a ni, " a ti a, "Ka ngaihdan chuan Dortmund hi Europe-a club ṭha ber pawl an ni a, thutlukna siam harsa lo tak a ni," tiin German club a pan chhan a sawi.

Belgian club Standard Liege aṭanga bul ṭantu Witsel hian 2011-12 kha Benfica tan khelin khawvel hriat a hlawh ṭan a, mahse 2012 khan rin loh takin Russian club Zenit Saint Petersburg chu pound maktaduai 35 chuangin a zawm a, 2017 khan rin loh lam bawk panin Tianjin a zawm a, tunah chuan Europe club lian zinga miah a khel ve dawn ta.