Paul Pogba chhuahtir duhtu Mino Raiola

Manchester United midfiel­der Paul Pogba agent Mino Raiola chuan a player hi Old Trafford aṭanga chhuahtir a duh niin khawthlang media-te chuan an tarlang leh ta.

Jose Mourinho-a'n pound mak­taduai 89-a a lei ṭuma khawvela footballer manto ber lo ni tawh Pogba hi season hmasa aṭang tawh khan Portu­guese manager nen an inhmu thiam lo nia sawi a lo ni tawh a, a agent Raiola hian a chhuah dan tur a dap mek.

Manchester City manager Pep Guardiola chuan Pogba leina 'chance' pek a nih tawh thu a sawi a, tuna club ri ring ber chu Barcelona an ni - Catalan club hian sum bakah player pek belh pawh an inhuam niin sawi a awm.

Not for Sale!

Thawhṭanni khan Pogba hian Manchester United trai­ning a zawm leh tawh a, Pogba kir zan vek hian Red Devils chuan an midfielder pawimawh hi zawrh lai a nih loh thu an sawi.

Hetihlai hian Barcelona chuan United hi an dawr ngei tawh niin sawi a awm a, mah­se tun dinhmunah chuan Man­chester khaw club hi an la ṭang rih. Barca-in pound maktaduai 40 leh Yerry Mina leh Andre Gomes pek tel an inhuam.

Khawthlang media-te thu hriat hi a dik a nih chuan United hi an ṭang tlang thei kher ang em, tih chu zawhna awm a ni a, chhanna pek harsa tak a ni bawk. Catalan club-in pawisa baka pek tel an tum zinga mi Colombian defender Mina hi Mourinho chil ti puttu zinga mi a ni.

Mahse Raiola hi!

Khawvela sports agent hausa leh thil ti thei ber ang hiala an chhal chu Mino Raiola a ni a, ani hi Pogba agent a lo ni kher hi United buaina chu a ni. Kum 50 mi hian club dawr dan a thiam a, a player-te hamṭhatna tura thil a thleng lo a nih chuan a sual thiam hle bawk!

United a hlawh hnem ber Alexis Sanchez-a'n kar khatah £500,000 a hlawh mek a, Raiola hian Arsenal forward hlui hlawh zat hi Paul Pogba-a'n hlawh ve se a duh. Mahse, United lam hian tun thlengin Raiola beiseina an la ti hlawhtling lo a, Pogba chhuahtir duhna rilru a put phah.

Pep-a'n Pogba zawrh a nih thu a sawi khan City hnena Pogba lo va zawrhtu hi Raiola a ni! Player langsar Zlatan Ibrahimovic leh Henrikh Mkhitaryan te pawh enkawltu agent hian Pogba-a'n Juventus aṭanga United a pan khan pound maktaduai 41 ngawtih a hausak belh a, a sum neih belhna tur a nih phawt chuan Pogba chhuahtir dan a zawng reng ang.

United leh bazar

Premier League-ah transfer bazar hun chhung an ti tawi tawh a, August 9 zanlaiah bazar theih hun chhung hi tihtawp a ni tawh dawn. United hian Pogba hi an hralh a nih chuan a thlakna tur leina hun an nei tlem tawh dawn tihna a ni a, hei vang tak hian United hian French midfielder hi an kaltir a rinawm loh zawk.

Tarlan anga Pogba hian Bar­celona a pan dawn a nih erawh chuan Spain-ah thla tawp hma chu transfer bazar a tawp dawn lo a, Catalan club hian thla tawp thleng Juventus midfielder hlui dawrna hun an nei dawn tihna a ni - mahse sawi tawh angin August 9 thleng bak player lalut thei lo United tan a thlaktu tur awm loa Pogba kaltir hi thil harsa a ni ang.

Hetihlai hian United hian Bayern Munich centre back Jerome Boateng an beisei mek a, mahse German club hian pound maktaduai 50 an beisei a, United lamin pound maktaduai 40 bak an phal lo thung. Mina, Leicester defender Harry Maguire leh Tottenham defender Toby Alderweireld chu United-in an beisei zingah tarlan an ni bawk.