Sindhu a beidawng lo

PV Sindhu chuan Badminton World Cham­pionship-ah gold medal la dawng lo mah se a beidawng lo a, engtikniah emaw chuan a tan hun ṭha a inher chhuah ngei a beisei thu a sawi chhuak.

Indian shuttler hian Pathianni zan khan Carolina Marin a hneh lo a, nikum ang bawkin silver medal-ah a lungawi a ṭul. Spanish nula Marin tho hi Rio Olympic gold medal match-ah a hneh lo bawk a, final lut ṭhin mah se a dingchang zawkah a la ṭang fuh hleithei lo a ni.

Kum 23 mi Sindhu chuan, "Final inkhel kha bul kan ṭan fuh hle a, set hmasa zawk kha la thei tur pawh ka ni. Mahse, tihsual ṭhenkhat ka neih kha ka tuar ta a ni," tiin a sawi.

Indian shuttler chuan sawi zawmin, "World Championship hi vawi nga ka khel tawh a, medal pali ka vaw chhuak. Heng zingah hian silver pahnih a tel, a chhe hran loin ka hria. Engtikah emaw chuan ka hun a la inher chhuak ve ngei ang," a ti.

Sindhu chher chhuak­tu India chief national badminton coach Pullela Gopichand pawhin a kum zawma World Champion­ship final khelh theih chu thil ṭha tak a nih thu a sawi a, beidawn hun a la ni lo tih a sawi lang bawk.