Pathianni aṭangin African Cup of Nations

Africa rama football inlena sang ber African Cup of Nations chu Pathianni aṭangin khelh ṭan a ni dawn a, match hmasa berah inelna thlengtu Cameroon leh Burkina Faso te zan dar 9:30-ah an inkhel ang.

Kum 2022-ah
AFCON hi nikum January thlaa khelh tur kha a ni a, amaherawhchu inelna thlengtu Cameroon-ah ruahsur hunlai a nih avangin June thlaah an sawn.

Covid-19 vangin June thlaah inelna neih theih a ni lo a, kumin January thlaah an sawn. Inelna neih hun avangin inelna buatsaihtu Confederation of African Football (CAF) an sawisel a, nikum kum tawp lam khan Covid-19 hri thar Omicron vangin an sawn dawn tih thawm a awm bawk.

Hetiang boruak karah Came-roonian Football Federation president Samuel Eto’o chuan kaltlangpui a nih tur thu a sawi a, Barcelona striker hlui chuan, "Engvang ngwtin nge kan ṭhulh ang. Hri leng karah Euro pawh stadium khatin an khel thei a, Europe khawpui hrang hrang an inkhel bawk," tiin a sawi.

Arsenal leh England striker hlui Ian Wright pawhin thuthar thehdarhtuten a chhe zawnga AFCON an ziak nasa chu a dem bawk.

Inelna chu
AFCON-ah hian a ṭum hnih nan team 24 an tel dawn a, European Championship nen inelna kalphung a inang. Ram 24 chu group rukah ṭhenhran an ni a, a sang pahnih ṭheuh bakah pathumna ti ṭha pali ten second round an lut dawn.

Ni khatah match thum a awm tlangpui dawn a, India sanaah chuan zan dar 6:30, 9:30 leh zan lai dar 12:30-ah te a ni ang. Inelna ball hman tur hi Umbro Toghu hming an vuah a, rawng chi hrang hranga chei a ni.

Champion rinkaite
Champion lai Algeria en kan a thiang lo a, anni hi match 34 chhung hneh loh nei tawh lo niin Manchester City winger Riyad Mahrez a telna a ni.

Senegal-in inelna hnuhnung final an thleng a, Liverpool forward Sadio Mane telna a nih avangin dah hniam a thiang lo. Chutihrualin champion ngun ber Egypt hian tun dinhmuna khawvela ṭha bera chhal ngam Mohamed Salah an kawl. Liverpool forward Salah hian Ballon d'Or a beisei a nih chuan AFCON nomawi hi a pawimawh ang.

African team lar dang Ghana leh Nigeria te hi World Cup 2022 qualifying-ah che ṭha tawk lo mah se dah hniam theih an ni lo a, champion tawh zinga mi Ivory Coast, Morocco leh Tunisia te pawh hi thleng sang thei zinga mi an ni ang.

Chutihrualin AFCON neih lai hian Europe-a club inelna chawlh a ni dawn lo a, tun ṭum inelnaah pawh hian Premier League player 30 chuang an tel. Hemi a nih avang hian Premier League club ṭantute chuan an player-te AFCON-a an chet ṭhat aiin league lama chhawr leh vat an duh zawk hial ang.

AFCON THLIRNA TAWI

Inelna thlengtu Cameroon
Team tel zat 24
Inkhelh hun 9 Jan - 6 Feb, 2022

Group ṭhen dan
Group A : Cameroon, Burkina Faso, Ethiopia & Cape Verde
Group B : Senegal, Zimbabwe, Guinea & Malawi
Group C : Morocco, Ghana, Comoros & Gabon
Group D : Nigeria, Egypt, Sudan & Guinea-Bissau
Group E : Algeria, Sierra Leone, Equatorial Guinea & Ivory Coast
Group F : Tunisia, Mali, Mauritania & Gambia

• Group tin aṭangin team pahnihin last 16 an lut ang a, pathumna zinga ti ṭha paliten knockout stage an lut bawk ang.
• Round of 16 hi January 23-26, 2022 chhunga khelh tur a ni.
• Quarterfinal hi January 29-30 ah khelh tur a ni a, Semfinal hi February 2-3 ah khelh tur niin Final hi February 6-ah khelh a ni ang.
• AFCON-a champion lai hi Algeria an ni a, final-ah Senegal 1-0 in an hneh.
• AFCON-ah Eygpt vawi sarih champion tawhin champion ngun ber an ni a; Cameroon (5), Ghana (4), Nigeria (3), Ivory Coast (2), Algeria (2), DR Congo (2) te bakah Zambia, Tunisia, Sudan, Etihiopia, Morocco, South Africa leh Congo te vawi khat ṭheuh an champion tawh bawk.

Fixtures
January 9, Pathianni
Cameroon 9:30 PM Burkina Faso
Ethiopia 12:30 AM Cabo Verde
January 10, Thawhṭanni
Senegal 6:30 PM Zimbabwe
Guinea 9:30 PM Malawi
Morocco 9:30 PM Ghana
Comoros 12:30 AM Gabon
January 11, Thawhlehni
Algeria 6:30 PM Sierra Leone
Nigeria 9:30 PM Egypt
Sudan 12:30 AM Guinea-Bissau
January 12, Nilaini
Tunisia 6:30 PM Mali
Mauritania 9:30 PM Gambia
Equatorial Guinea 12:30 AM Ivory Coast