Gerrard-a'n Villa-ah Coutinho a lalut

Aston Villa chuan Liverpool playmaker hlui Philippe Coutinho chu Barcelona aṭangin season tawp thleng atan loan-in an hawh a, an duh chuan a nghetin an lalut zui thei ang.

BBC chief football writer Phil McNulty chuan, "Villa hian Barca-a a hlawh chanve aia tlem Coutinho hi an pe dawn a, season hmasaa Chelsea aṭanga loan-a Ross Barkley an hawhna man ai khan a tlawm a ni," a ti.

Coutinho hi Villa boss Steven Gerrard nen Liverpool tan an lo khel dun tawh ṭhin a, Gerrard hian Coutinho an lalut dawn tih a chian hma khan, "Player ṭha bik ni lo se 'Magician' tih hming lem pek a ni lo ang," tiin a ṭhianpa hi a lo fak tawh.

Liverpool manager la ni tura Reds fans tam takin an beisei Gerrard hian, coaching a luhchilh hnuah hun tam la hmang lo mah se theihna sang tak a nei tih hmuh turin a awm leh der tawh.

Season hmasa khan Rangers chu tlawm nei miah loin Scottish Premiership-ah nomawi a chawipui a, March 7-a champion nomawi an chawi chu Scottish Premiership-a champion hma ber record a ni.

Tun season-ah pawh Rangers hi league-a hma a hruaipui mek laiin a chhuahsan a, Villa a zawm. Gerrard-a sulhnu a ropui a, Coutinho hrechiangtu a nih bawk avangin Brazilian midfielder tan a captain hlui pan hi thutlukna fing niin a lang.

Kum 41 mi Gerrard chuan, "Coutinho chungchangah hian a chhe lam sawi tur ka hre miah lo. Ka ṭhian ṭha tak a ni a, thil dang a chungchang thu min zawt duh a nih chuan rei tak sawi tur ka nei. Mahse, Villa nena sawizawm tir phet min tum a nih erawh chuan in nghah rei ve a ngai khawp ang," tiin press conference-ah a sawi a, a hnu lawkah an lakluh thu a chiang zui.

Brazilian midfielder Coutinho hian January 2018 khan Anfield chhuahsanin Barcelona a pan a, Nou Camp-a a puanthuah tel lut tur hian Catalan club hian Liverpool hi pound maktaduai 142 an pe.

Mahse, Barcelona-ah beisei angin Coutinho a khel chhuak lo - match 106 chiah la khelhsakin goal 26 a khung a, season khat chu Bayern Munich lamah loan-in hun a hmang hial a ni.

Heti chung hian club tam takin Coutinho an la duh a, Villa bakah Arsenal, Everton, Newcastle United leh Tottenham Hotspur te chuan Brazilian midfielder hi lakluh an duh a, a tawpah Villa a pan.

Gerrard chuan, "Barcelona-ah league nomawi pahnih a chawi a, Copa del Rey nomawi pahnih a la bawk. Coutinho chanchin hi wiki-ah chhiar ula, player ṭha a nihzia in hmu ang a, a kalna apianga a hlawhtlinzia in hmu ang.

"Brazil tan match 63 a khel a, Barcelona tan a khel a, Liverpool-ah hun duhawm tak a hmang bawk. Hei vang hian club tam takin an duh hi a awm hi a awm ka ti takzet a, fan-ten a chanchin an tuipui pawh hi awm ka ti em em a ni," a ti.

Kum 29 mi Coutinho hian January 2013 khan Inter Milan aṭangin Anfield hi a pan a, Gerrard-a'n Los Angeles Galaxy a pansan hma khan season hnih leh a chanve an khel dun hman.

Coutinho hian Liverpool-ah season nga leh a chanve hun a hmang hman a, match 201-ah goal 54 khungin assist vawi 45 a nei a, Jurgen Klopp-a'n a ui viau chungin Barcelona a pan a, a ti fuh lo - Villa-ah a hming chher leh a tum ang.