Newcastle-in Trippier an lalut

Newcastle United chuan Atletico Madrid aṭangin Kieran Trippier chu pound maktaduai 12 in an lalut a, kum 2024 thleng cham turin contract a ziak. England international defender hi a chet ṭhat dan a zirin a man hi a la pung thei ang.

Saudi Public Invest-ment Fund-in pound maktaduai 305-a Newcastle an lei hnuah Trippier hi an lakluh hmasa ber a ni a, Magpies neitu thar hausakna hi pound tluklehdingawn 320 vel zet a nih avangin player ṭha an la seng luh zel a rinawm.

Kum 31 mi Trippier chuan, "Club ropui tak ka zawm thei hi ka lawm. Atletico nuam ka ti a, amaherawhchu Newcastle-in min duh tih ka hriat khan ka ngaihven nghal. Eddie Howe nen kan thawk dun tawh a, helai hmuna rawn kal hi ka duh dan a ni," tiin a sawi.

Newcastle manager Eddie Howe hian kum 2012 khan Burnley a enkawl laiin Trippier hi a lalut tawh. English defender hian season liam ta khan La Liga-ah Atletico a champion pui a, nikum nipui bazar hunlai khan Manchester United nen sawizawm a ni bawk.

English manager Howe chuan, "January transfer atan hian hun rei tak kan inbuatsaih a, kan player duh tak Trippier rang taka kan lalut hian inbuatsaihna ṭha kan nei tih a tilang," tiin a sawi.

Magpies hian Premier Legue match 19 khelh tawhah point 11 an hmu a, 19-naah awmin an hnuaia awm Norwich aiin point khat chauhin an hmu tam. Howe leh a hote tan Premier League-a inham tan chu an hna hmasa a ni dawn a, a awlsam dawn lo.