FA Cup: Thawnthu ngaihnawm ziahin a awm dawn em?

Knockout tournament danglamna chu rin loh zawk pawh an chak thei ṭhin hi a ni a, football thawnthu a ngaihnawm bik a, a mawi zual bik ṭhin.

English football-a inelna ngaihhlut hlawh tak FA Cup third round pawh khelh ṭan a ni leh ta a, team inthlau tak tak intawng leh tur hi a ngaihnawmna belhchhahtu a ni dawn.

Nizan khan Manchester City leh Leaguw Two club Swindon Town an inkhel a, he thu buatsaih a nih lai hian result kan hre hman lo.

Covid-19 vangin FA Cup third round-ah team an inhnehtawk a nih pawhin ṭum dang angin replay a awm dawn lo a, extra time leh penalty hmangin chin fel zel tur a ni.

Chelsea hmabak
Liverpool nena inhnehtawk hlim Chelsea chuan zanin dar 11:00-ah non-league club Chesterfield an mikhual dawn a, team pahnih inthlau lutuk hian inkhel en a ti châkawm zual sawt!

Chesterfield hian English fifth division, National League-ah hmahruaitu an ni mek a, Premier League-a pahnihna Chelsea nena an inkarah hian team 92 zet an la awm - an inthlauh dan hi a namai lo hle.

Mahse, Chesterfield ang tan chuan Chelsea hmachhawn hi a lawmawm - he inkhel avanga an sum lakluh tur ringawt hi a tam a, ṭum dang zawng aiin an club-in ngaihven an hlawh phah bawk.

Spireites (Chesterfield sawina) boss James Rowe chuan, "Ka tan chuan duhthusam thleng dik a ni. Kum liam ta mai kha chuan kan league mawngphah chung chiahah kan awm - tunah chuan hma kan hruai a, Chelsea kan hmachhawn leh dawn ta. He club tan chuan a ropui a ni," a ti a, huphurh zawngin a thlir lo.

A ngaihnawm
Chelsea ṭhatzia kan hre sa a, an chanchin inhrilh nawn a ngai lo - Chesterfield ho chanchin hi a ngaihnawm lai ber chu a ni a, non-league club hian Blues an hmachhawn dawn avangin ngaihven an hlawh thar.

Thil danglam ve tak chu Chesterfield hi Stamford Bridge-a league game-a chak hmasa ber an ni a, kum 1905 khan league match-ah Chelsea an lo hneh tawh.

Chesterfield hi club neitu chungchangah rei tak chu an lo buai tawh a, an club pawhin chhiat lam a pan hman. Mahse, thla 17 liam ta khan club fans intelkhawm Chesterfield FC Community Trust chuan an club hi leiin an chhan chhuak.

Club ṭantuten an club an lei hnuah theihtawp an chhuah a, tun dinhmun thleng leh tura an thawhrimna hian fak a phu hle - Stamford Bridge-ah an leng dawn a, inelng satliah nih an tum lo ang.

Foxes vs Watford
Zanin dar 8:30-a Leicester City leh Watford inkhel tur hi en châkawm pawl a ni a, team pahnih hi Premier League club ve ve an nih avangin an inkhel pawh a hmuhnawm ang tih a chiang.

Leicester hi Premier League-a 1-0 a Liverpool hneh hlim an ni a, an phur vanglai tak a ni ang tih a chiang. Watford erawh November thla tawp lama 4-1 a Manchester United an hneh hnuah ngai an la awh lo.

Red Devils an hneh hnuah league match ruk an khel a, an tlawm vek - heng zingah hian Leicester laka 4-2 a an tlawm chu a tel a, relegation zone aṭangin point hnih chiahin an him.

Watford boss Claudio Ranieri tan buaina aṭanga tal chhuak turin Foxes lakah chak a ṭul a, FA Cup aṭanga Foxes an pet chhuak thei a nih chuan fans leh player pawh an phur thar sawt ang.

FA Cup Third Round
Zanin Inkhel Tur
Mansfield Town 05:45 PM Middlesbrough
Coventry City 06:00 PM Derby County
Burnley 06:00 PM Huddersfield Town
Hartlepool United 06:00 PM Blackpool
Bristol City 06:00 PM Fulham
Millwall 06:15 PM Crystal Palace
Boreham Wood 08:30 PM AFC Wimbledon
West Bromwich Albion 08:30 PM Brighton & Hove Albion
Kidderminster Harriers 08:30 PM Reading
Leicester City 08:30 PM Watford
Port Vale 08:30 PM Brentford
Wigan Athletic 08:30 PM Blackburn Rovers
Newcastle United 08:30 PM Cambridge United
Barnsley 08:30 PM Barrow
Peterborough United 08:30 PM Bristol Rovers
Queens Park Rangers 08:30 PM Rotherham United
Swansea City 11:00 PM Southampton
Chelsea 11:00 PM Chesterfield
Hull City 11:00 PM Everton
Birmingham City 11:00 PM Plymouth Argyle
Yeovil Town 11:15 PM AFC Bournemouth

January 09, Pathianni Zan
Luton Town 06:00 PM Harrogate Town
Stoke City 07:30 PM Leyton Orient
Liverpool 07:30 PM Shrewsbury Town
Cardiff City 07:30 PM Preston North End
Tottenham Hotspur 07:30 PM Morecambe
Wolverhampton Wanderers 07:30 PM Sheffield United
West Ham United 07:30 PM Leeds United
Charlton Athletic 07:30 PM Norwich City
Nottingham Forest 10:40 PM Arsenal

January 10, Thawhṭanni Zan
Manchester United 1:25 AM Aston Villa