Chak dan thiam lo NorthEast!

Khalid Jamil-a enkawl NorthEast United-in eng ruai an ang thei lo - Ningani zan khan Jamshedpur FC lakah 3-2 in an tlawm leh ta a, match 10 an khelh aṭangin point riat chiah an la nei ta.

Highlander tan an match hnuhnung bera hattrick siamtu Deshorn Brown chuan minute lina lekah goal hmahruai a khung a, mahse, Jamshedpur hian Jordan Murray leh Boris Singh hmangin an chhanglet a, Highlander bawk an buai.

Hun pek belh minute khatnaah Brown bawk a inlar leh a, Jamaica international hian si phurh a rawn sut - kum 31 mi striker goal khung hun ngaihtuahin team pahnihin point an insem mai a rinawm hman.

Mahse, Jamshedpur tan Indian striker Ishan Pandita chuan minute hnih hnu lawkah goal a rawn khung ve leh a, hun tawp thlenga goal dang lut loin Jamshedpur an chak.

Jamshedpur forward Greg Stewart chuan penalty box-ah ball a thlawh lut a, hei hi Alexandre Lima chuan lo la thlain Pandita tan a siamsak - Indian forward hian awlsam takin goal-ah a chantir.

Lima hian goal luh hma hian a kutin ball a tawk fuh a, a kut hmangin Pandita tan a siamsak - mahse, referee-in handball a hmu lo a, a tawpah Highlander an vanduai phah ta a ni.

Men of Steel (Jamshedpur sawina) tan Ricky Lallawmawma leh Laldinliana Renthlei ten inkhel bul an ṭan a, Highlander tan Mizo player bul ṭan awm lo mah se Rochharzela, Lalkhawpuimawia leh William Lalnunfela te chu bench aṭangin an lut.

NorthEast coach Khalid Jamil chuan, "Ka player-ten an khel ṭha a, dem tur an awm lo. Kan result avanga sawisel tur an awm a nih chuan keimah hi sawisel tur chu ka ni," a ti a, an chak lohnaah tumah a dem duh lo.

January 6, Ningani Zan
Jamshedpur FC 3 - 2 NorthEast United
JFC: Jordan Murray 44'; Boris Singh 56'; Ishan Pandita 90+3'
NEU: Deshorn Brown 4', 90+1'

Zanin Inkhel Tur
ATK Mohun Bagan 7:30 PM Odisha FC
FC Goa 9:30 PM Chennaiyin FC

January 9, Pathianni Zan
Kerala Blasters 7:30 PM Hyderabad FC