Auba-a'n hripui a kai

Arsenal captain aṭanga an paih Pierre-Emerick Aubameyang chuan chanchin lawmawm lo a nei chhunzawm. Gabon tan Afican Cup of Nations khel tura a feh chhuahna lamah Covid-19 a kai tih hmuh chhuah a ni.

Cameroon airport-ah zin lutte endik hmasak ṭhin an ni a, tun ṭumah hian Aubameyang leh Nice midfielder Mario Lemina bakah Gabon coach Nicet Yala ten hri hi an kai.

Gabon head coach Patrice Neveu chuan mi pathumin hri an kai thu hi African Football Federation a hriattir nghal a, an thlenna hotel-ah khung hran niin, PCR test an nei leh ang.

Gabon hi group C-ah awmin Thawhṭanniah an match hmasa ber atan Comoros nen an inkhel dawn. January 14, Zirtawpniah Ghana nen an inhmachhawn leh nghal bawk ang.

Kum 32 mi Auba hi thla hmasa khan thu a awih loh avangin Arsenal captain a nihna hlihsak a ni a, a hnu lamah match a la khel leh lo - tunah hri a kai leh tak avangin Gabon captain hian 100% fit chuan inelna a hmachhawn lo ang tih a rin theih.

Africa rama football inelna sanga Afcon hi Pathianni zanah khelh ṭan a ni dawn a, match hmasa ber atan a thlengtu Cameroon leh Burkina Faso te an inkhel ang.