Barca-in Haaland lakluh an tum dawn
Spanish football expert Guillem Balague chuan Borussia Dortmund striker Erling Braut Haaland chuan nipuiah Barcelona a zawm mai theih thu a sawi a, "Catalan club hian an lakluh theih ngei an inbeisei a ni," a ti.
Kum 21 mi striker hian a contract-ah pound maktaduai 62.6-a a chhuah theih tur thu a ziak tel a, Barca hian heti zata an dawr a nih chuan Dortmund tan dan theih a ni dawn lo, tihna a ni.
Balague chuan, "Barca hian player hlawh hnem leh langsar ho an chhuah ṭhentir phawt a ngai dawn a, mahse, an tih theih mai an inring tlat a ni," a ti.
Barcelona hian sum neih loh chhuanlamin Lionel Messi chhuahtir mah se an indinthar leh mek. American investment bank Goldman Sachs aṭangin tluklehdingawn 1.5 an puk dawn a, a hmain euro maktaduai 595 an lo puk tawh bawk.
Manchester City aṭangin Ferran Torres chu pound maktaduai 46.3-in an lalut tawh a, euro tluklehdingawn khat chuang leiba nei mah se loan hmangin insiamṭhat an tum mek.
Balague chuan, "Barca hian Philippe Coutinho, Samuel Umtiti, Sergino Dest, Clement Lenglet, Frenkie de Jong, Martin Braithwaite, Oscar Mingueza leh Luuk de Jong te an zuar mek a, an tan player thar lakluh hi a har lo ang," a ti.
Haaland hian Dortmund tan inelna hrang hrangah match 74 khelin goal 76 a khung tawh a, European club lian tam takin duh mah se La Liga lamin a lung a len nia sawi a ni.
Balague chuan, "Haaland-a agent Mino Raiola leh Laporta hi inṭhian hnai tak an ni a, Barca hian sum an neih phawt chuan an dinhmun a ṭha khawp ang. Inremna ang rengin Laporta hian Raiola player naupang zawkte a la tel mai dawn a ni," a ti a, Raiola tan pawh sumdawnna ṭha tak a nih theih thu a sawi.
Barcelona hian France forward Ousmane Dembele pawh contract thar an zawrh a, mahse, kum 24 mi hi a hlawh tihniam tura an beisei tel avangin Dembele-a'n contract a pawm lo - a chhuah hmel hle.
La Liga-ah Barca hi pangana an ni mek a, hmahruaitu Real chu point 15-in an phak lo a, Champions League last 16 an inpetkai lo bawk.
La Liga - Zanin Inkhel Tur
Levante 06:30 PM Real Mallorca
Real Sociedad 08:45 PM Celta Vigo
Granada 11:00 PM Barcelona
Real Madrid 01:30 AM Valencia
January 9, Pathianni Zan
Rayo Vallecano 06:30 PM Real Betis
Sevilla 08:45 PM Getafe
Alaves 11:00 PM Athletic Bilbao
Osasuna 11:00 PM Cadiz
Villarreal 01:30 AM Atletico Madrid
January 10, Thawhṭanni Zan
Espanyol 01:30 AM Elche