Giroud hoin Milan-in Roma an hneh
Jose Mourinho leh a nauten AC Milan an ngam lo, striker Olivier Giroud a chet ṭhat avangin Milan hian an mikhual Rome khaw club hi 3-1 a hnehin Serie A nomawi chawi an beiseina a la nung zel.
Ningani zan inkhel dangah Juventus leh Napoli te 1-1 in an inhnehtawk a, champion lai Inter Milan leh Bologna inkhel tur bakah match dang pathum chu Covid-19 vangin a hun sawn a ni. Tun kar tawpah league match a awm zui dawn, hri leng vanga a hun sawn pawh a awm leh mai thei.
Milan chungnung
San Siro-a inkhelah Milan an chungnung viau. Minute riatna lekah Tammy Abraham-a'n handball vangin penalty a chawi a, penalty pettu Giroud-a'n a hlah lo. Minute 17-na lekah mikhual Roma an chesual chhunzawm.
Defender Roger Ibanez-a back pass sual chu Giroud-a'n la hmanin goal ban a pet per a, a per let hi Junior Messias chuan an goal hnih nan a khung; chawlhlawk hmain Abraham-a'n Roma tan si phurh a sut ṭhen.
Second half-ah Roma an che fuh thei chuang lo. Yellow card pahnihna hmuh vangin Rick Karsdorp hnawh chhuah a nih hnuah Milan lamin substitute Rafael Leao hmangin an goal thumna an khung a, hun tawp dawna Zlatan Ibrahimovic penalty pet erawh Rui Patricio-a'n a dansak.
Hnehna changtu Milan hian Serie A match 20 aṭangin point 45 an hmu a, hmahruaitu Inter Milan an phak lohna chu point khat chauh a ni. Inter hian match khatin an la khel tlem thung a, an inkar a la zau belh leh thei.
Lawm leh lawm lo
AC Milan manager Stefano Pioli chu a naute khelh danah a lawm a, season hmasa lama uiawm taka nomawi an beiseina thamral tir mai a tum tawh lo. Pioli chuan, "Kan khel ṭha hle a, team ṭha lakah kan chak thei tih a takin kan lantir.
"Rafael Leao, Ante Rebic leh Zlatan Ibrahimovic te hliam a dam ta a, chanchin lawmawm bik a ni," a ti. Milan hian Fikayo Tomori, Alessio Romagnoli, Fode Ballo-Toure leh Simon Kjaer te erawh hliam vangin an la chhawr thei lo.
Roma manager Mourinho erawhin a lungawi loh thu sawiin, "Khelmual chhunga ka naute chet dan kha a hniam hle, khatianga kan khel a nih chuan San Siro aṭanga point thum hmuh kan beisei tur a ni lo," a ti, tun hma pawhin a naute sawisel a hreh lo ṭhin.
Mourinho enkawl Roma hian beisei an phak hleithei lo. Point 32 chauh an la neih avangin pasarihna an ni, palina Atalanta an phak lohna chu point ruk niin - Atalanta hian match khatin an khel tlem bawk.
Inkhel dang
Juventus pawh an kal vung hleithei lo. Old Lady hian an mikhual Napoli lakah goal an chhuah hmasa, minute 23-naah Dries Mertens-a goal khung chu second half-ah Federico Chiesa-a'n sutin point khat an hlawh chhuak hram a ni.
Massimiliano Allegri naute hian season bul an ṭan fuh loh avangin champion an beisei ngam tawh lo. An insiamṭhat hnuah Champions League khel phak tura ngaih an ni a, chutih rualin team dang an chetsual lai an ngaihchan tel a ngaih tawh avangin a awlsam lo ang.
Juve manager Allegri chuan, "Kan khingpuite goal bula kan hriam tawk lo hi kan tuar ṭhin," tiin an chak zawh loh chhan a sawi. Napoli manager Luciano Spalletti erawh a naute khelh danah a lungawi a, vanduai vang chauha point thum hmu lo an nih thu a sawi.
Ningani zan inkhel dangah Lazio leh Empoli te 3-3 in an inhnehtawk a, table mawngphah lama talbuai lai Cagliari chuan Sampdoria 2-1 a hnehin point thum hlu tak an hlawh chhuak ve thung a ni.