Bagan-ah Jhingan a lo kir

Indian football team defender Sandesh Jhingan chuan Croatian top-tier club HNK Sibenik-a a contract neih lai a titawp a, a club hlui ATK Mohun Bagan-ah bawk a kir leh ta.

Kum 28 mi centre back hian August 2021 khan Sibenik hi a zawm a, Croatian club-ah hian kum khat chhung atan contract a ziak a, kum khat dang cham belh thei tura tih a ni bawk.

Mahse, Croatia-a a pem hnuah hliamin Jhingan a tlak buak a, Sibenik tana inlan miah loin a lo kir. Indian defender chuan, "Inkhelh ka duh luatah ka nghak zo lo ṭhin a, a dam chian hmain ka inhliam leh ṭhin a ni," tiin Croatia-a a hun hman dan a sawi.

India tana vawi 40 inlan tawh defender hian Mariners-ah hian season tawp thleng cham turin contract a ziak a, Bagan chuan, "Kan tlarhnung lam tan chuan chanchin lawmawm a ni," tiin an defender hlui an lak let chungchang an sawi.

Jhingan chuan, "ATK Mohun Bagan ka zawm thei hi ka lawm takzet a, ka tan chuan chhungkua ang mai an ni a, engtiklai pawhin min thlawp tlat reng ṭhin - a bik takin tun hnaia hliam vanga ka talbuai laiin min kuangkuah tlat a ni," a ti a, Kolkata club chungah a lawm hle.