Hri lengin PSG a tibuai

Paris St Germain chuan an winger Angel di Maria leh midfielder Julian Draxler ten coronavirus an kai thu an puang a, tun kar tawpa Lyon nen Ligue 1 match pawimawh an khelh hunah an chhawr thei dawn lo.

Argentina inter-national Di Maria hian season kal laiah PSG tan match 16 aṭangin goal thum a khung a, assist vawi nga a nei bawk. Germany international Draxler hian goal hnih leh assist vawi hnih bawk a nei thung.

Paris club chuan Ningani zan khan an player pahnih ten hri an kai thu hi an puang a, midang tlawh pawh loh tura khung hran an ni. Thlasik chawlh an hmanna lamah Lionel Messi chuan hri a lo kai tawh bawk a, mahse ani chu a negative leh tawh.

France ramah hripui a hluar chho leh mek. Nilaini khan kai thar mi 3,32,000 an awm a, Ningani khan mi 261,481 hmuhchhuah an ni bawk. Tun hnai ni sarih chhung chu ni tin kai thar mi 200,000 an chuang leh tawh.

Ligue 1 match 19 an khelh tawh chinah PSG hian hma an hruai mek a, anmahni hnaih bertu Nice aiin point 19 zetin an sang fal. Season hmasa lama league nomawi an chawi loh chu an laklet ngei hmel.

Pathianni zan dar 1:15 hian team ṭha Lyon khelmualah an leng lut ang.